देवदास बंजारे स्मृति पुरस्कार 2020 खातिर आवेदन 14 दिसंबर तक

अंजोर.रायपुर। छत्तीसगढ़ शासन के संस्कृति विभाग कोति ले पंथी के आधुनिक गुरू देवदास बंजारे के सुरता म दे जाने वाला देवदास बंजारे स्मृति पुरस्कार 2020 खातिर आवेदन एसो 14 दिसंबर तक मंगाये गे हावय। मिले आरो के मुताबिक जानबा होवय के ये सम्मान म व्यंक्ति या संस्था ल प्रशस्ति पत्र आ 50 हजार रूपिया ले सम्मानित करे जाथे। एसो कोरोना के काल के सेती ऑनलाइन आवेदन विभाग के मेल म भेजे बर परही।  

ये बात ल तो सबोच ह जानथे के देवदास बंजारे जी पंथी के बड़का कलाकार रिहिन अउ ओमन देश विदेश म पंथी के नवा रूप के संग गुरू बाबा के संदेश ल बगराये के जबर बुता करे हावय। इही सेती उंकर नाम म सम्मान दे जाथे। फेर विभाग के नियम के मुताबिक येहा पंथी बर पोगरी नइये। नियम किथे- ‘छत्तीसगढ़ शासन, संस्कृति विभाग द्वारा छत्तीसगढ़ की लोक शैली पर आधारित प्रदर्शनकारी छत्तीसगढ़ी लोक कला के क्षेत्र में व्यक्ति/ संस्था को प्रोत्साहन देने एवं सम्मानित करने के उद्देश्य से प्रदेश के सुप्रसिद्ध पंथी नर्तक स्व. देवदास बंजारे की स्मृति में राज्य स्तरीय ‘ देवदास बंजारे स्मृति पुरस्कार’ स्थापित किया गया है।’  माने येमा कोनो भी लोक कलाकार ह आवेदन भर सकत हाबे। आवेदन ल भेजइया मन मेल ले पठोही जेन ह 20 पेज के पीडीएफ म 10 एमबी तक के होना चाही। अऊ ये संबंध म कोनो पाती नइ स्वीकार करे जाए।