राज्य महिला आयोग के पहल म चार महीना के लइका ल मिलिस महतारी के कोरा

अंजोर.रायपुर। छत्तीसगढ़ राज्य महिला आयोग के अध्यक्ष डॉ किरणमयी नायक ह अपन आयोग कार्यालय म जिला के महिला मनके उत्पीड़न संबंधित प्रकरण म जन सुनवाई करिन। प्रस्तुत प्रकरण शारीरिक शोषण, मानसिक प्रताड़ना, दहेज प्रताड़ना, सम्पत्ति विवाद आदि ले संबंधित रिहिन। एक प्रकरण के सुनवाई करत आयोग के अध्यक्ष ह किहिन के चार महीना के बच्ची ल माँ ले दूर रखना गलत हावय। बच्ची के सबो देखभाल खातिर माँ के नितांत आवश्यकता हावय। आयोग के समझाइश म बच्ची के पिता अगला दिन ही आयोग के समक्ष माँ ल सौपे खातिर तैयार होगे। 

एक आन प्रकरण म रायपुर निवासी महिला ह अपन बड़े बेटा ले मानसिक रूप ले प्रताड़ित करे के शिकायत आयोग ले करे रिहिस। प्रकरण के सुनवाई करत आयोग के अध्यक्ष डॉ. नायक ह बड़े बेटा ल पिता के सम्पति ले हिस्सा लेके अलग रहे ल किहिन। अइसने भिलाई म महिला महाविद्यालय के सहायक प्राध्यापिका ल प्रबंधन ह समय ले पहली सेवानिवृत्त करके प्रताड़ित करे के मामला आयोग के समक्ष आइस। जेमा प्राध्यापिका ल सितंबर माह के वेतन काम करे बाद भी नइ दे हावय। आयोग के अध्यक्ष ह एक सप्ताह के भीतर वेतन भुगतान करे बर प्रबंधन ल किहिन।