मसूरी अउ देहरादून सहिक विकसित हो सकत हावय चिरमिरी के स्कूल : मुख्यमंत्री भूपेश बघेल

अंजोर
0

अंजोर.कोरिया। प्रदेश के मुख्यमंत्री श्री भूपेश बघेल ह चिरमिरी के गोदरीपारा म नवा बने स्वामी आत्मानंद इंग्लिश मीडियम स्कूल के शुभारंभ करिन। ये मउका म मुख्यमंत्री ह किहिन के प्रदेश के दूरस्थ अंचल के लइका मनके पढ़ाई के खातिर अगले एक साल म एक सौ नवा इंग्लिश मीडियम स्कूल अउ शुरू करे जाही। श्री बघेल ह किहिन के गरीब परिवार के बच्चा के तको अंग्रेजी मीडियम के अच्छे स्कूल म पढ़े अउ आगू बढ़े के सपना ल साकार करना सरकार के प्राथमिकता म हावय। मुख्यमंत्री ह जनप्रतिनिधी मनके मांग म चिरमिरी म डॉक्टरी के पढ़ाई के खातिर नवा मेडिकल कालेज खोले के प्रस्ताव तइयार कराके केंद्र सरकार ल भेजे के तको बात किहिन। 

श्री बघेल ह चिरमिरी के गोदरीपारा म बने स्वामी आत्मानंद इंग्लिश मीडियम स्कूल के भव्य भवन के तको अवलोकन करिन अउ स्कूल के छत ले आन जनप्रतिनिधी मनके संग चिरमिरी के पहाड़ी-घाटी के प्राकृतिक सौंदर्य के दर्शन तको करिन। मुख्यमंत्री ह ये बखत स्कूल के नवनियुक्त शिक्षक अउ प्रवेशित बच्चा ले तको मुलाकात करिन। 

मुख्यमंत्री श्री बघेल ह स्वामी आत्मानंद इंग्लिश मीडियम स्कूल के भवन अउ परिसर अवलोकन करे के बाद किहिन के ये स्कूल मसूरी अउ देहरादून के स्कूल मन सहिक विकसित हो सकत हावय। चिरमिरी के आबो हवा अउ प्राकृतिक सौंदर्य ये खातिर बहुत अनुकूल हावय। परिसर म सुविधा ल बढ़ाके हम येला एक अच्छा पर्वतीय क्षेत्र के स्कूल कस विकसित कर सकत हाबन। 

कार्यक्रम म जिला के प्रभारी मंत्री डॉ. शिव डहरिया, स्कूल शिक्षा मंत्री डॉ. प्रेमसाय सिंह टेकाम, उच्च शिक्षा मंत्री उमेश पटेल, खाद्य मंत्री अमरजीत भगत, संसदीय सचिव अउ विधायक बैकुण्ठपुर श्रीमती अंबिका सिंहदेव, विधायक मनेन्द्रगढ़ डॉ. विनय जायसवाल, सरगुजा विकास प्राधिकरण के उपाध्यक्ष अउ विधायक भरतपुर-सोनहत गुलाब कमरो, नगर निगम चिरमिरी के महापौर श्रीमती कंचन जायसवाल संग अऊ केऊ जनप्रतिनिधी तको मौजूद रिहिन।

एक टिप्पणी भेजें

0टिप्पणियाँ

सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।

एक टिप्पणी भेजें (0)

#buttons=(Accept !) #days=(20)

Our website uses cookies to enhance your experience. Check Now
Accept !