खुड़मुड़ा हत्या कांड म अब तक आरोपी फरार, परिवार ले मिलिस मुख्यमंत्री

अंजोर.दुर्ग। पाछू दिन दुर्ग जिला के पाटन ब्लॉक के गांव खुड़मुड़ा म एकेच परिवार के चार झिन के हत्या होगे। जानबा होवय के खुड़मुड़ा राजधानी ले लगे गांव आए अउ महादेवघाट के ओ पार परे के सती भू माफिया मन तको उहां सक्रिय हाबे। सोनकर परिवार ह खेती बुता करय, कोन जनि काकर ले अऊ का बात के अतेक बैर रिहिसे ते चार झिन ल मार के सुता दिस।

आज सीए बघेल ह खुड़मुड़ा पहुंचिन अउ शोक संतप्त परिवार ले मुलाकात करत ओ मनला ढांढस बंधाइस। ये मउका म ओमन किहिन के हादसा म जान गवांये स्वर्गीय श्री बालाराम सोनकर के परिवार के 4 लइका मनके पढ़ई के खर्च राज्य सरकार उठाही। चारों बच्चा के खातिर एक-एक लाख रुपिया के राशि बैंक म फिक्स्ड डिपॉजिट करे जाही अउ लइका मनके लालन पालन खातिर एक लाख रुपिया परिजन मनला दे जाही। मुख्यमंत्री ल परिजन मन वारदात के संबंध म विस्तार ले घटना के जानकारी दीस। मुख्यमंत्री ल पुलिस महानिरीक्षक विवेकानंद सिन्हा अउ दुर्ग के पुलिस अधीक्षक प्रशांत ठाकुर ह विस्तार ले जांच के प्रगति के जानकारी दीस।

छोटकुन गांव के किसान परिवार म अतेक बड़का घटना होगे अउ चार दिन बिते के बाद घलोक हत्यारा मनके कोनो सोर पता नइ चले हाबे। कोजनि पुलिस के जांच अभी कतका दुरिहा पहुंचे हवय, आन लोगन मन अब तो जांच टीम के बजाए सीबीआई जांच के मांग करत हाबे। संका तो यहू बात के लगाये जात हावय के येमा भू माफिया मनके तको हाथ हो सकत हाबे।