अंजोर.रायगढ़। पुलिस चौकी रैरूमाखुर्द के 12 साल के लइका ल किडनैप करके आरोपी मन परिवार ले 5,00,000 रूपिया के फिरौती मांगत रिहिसे। घटना के आरो पाके तुरते पुलिस अधिकारी मन रातेच कन एक टीम अपहृत बालक के रेस्क्यू के खातिर तइयार करिन अउ ओला हथियार ले लैस करके जंगल अंदर रवाना करिन। 12 घंटा के भीतर ही पुलिस टीम ह आरोपी मनके मंसूबा म पानी फेरत लइका ल सकुशल बरामद कर लिस। मिले आरो के मुताबिक गिरफ्तार आरोपी म एक आरोपी हाल ही के चोरी के मामला म तको शामिल रिहिसे।
जानबा होवय के पुलिस चौकी रैरूमा थाना धरमजयगढ़ के ग्राम बरहामड़ा म रहइया संजू बड़ा डहर ले पुलिस चौकी आके अपन लइका राहुल बड़ा ल अज्ञात आरोपी मन डहर ले किडनैप करके मोबाइल म 5,00,000 के फिरौती खातिर कॉल करे के जानकारी दे गिस। चौकी प्रभारी उपनिरीक्षक जेम्स कुजूर तत्काल घटना के जानकारी एस.पी. रायगढ़ संतोष कुमार सिंह ल दिस। मामला के गंभीरता ल देखत पुलिस अधीक्षक डहर ले एडिशनल एसपी रायगढ़ अभिषेक वर्मा, सहायक पुलिस अधीक्षक पुष्कर शर्मा, एसडीओपी धरमजयगढ़ सुशील नायक ल रैरूमा रवाना करत चौकी प्रभारी जूटमिल, थाना प्रभारी घरघोड़ा, धरमजयगढ़, तमनार, लैलूंगा, कापू ल अपन-अपन क्षेत्र म नाकेबंदी करके अपहृत बालक अउ आरोपी मनके सघन जांच करे खातिर निर्देशित करे गिस।
जांच टीम डहर ले संदिग्ध/आरोपी किस्म के लोगन मनके खोजबीन तेज करत चोरी के मामला म पकड़ाये संदिग्ध अरूण टोप्पो ग्राम धौंरागांव बरपाली अउ विकास तिर्की ल संदेह म रखत पतासाजी करे गिस। तभे पुलिस ल आरो मिलिस के जंगल भीतर तीन नकाबपोश एक बालक के हाथ, पैर बांध के रखे हावय। बालक के रेस्क्यू खातिर हथियार ले लैस होके जंगल म पुलिस पार्टी रवाना करे गिस जेन ह बालक के सकुशल बरामदगी के साथ तीन आरोपीगण-विकास तिर्की, अरूण टोप्पो अउ रामेश्वर मांझी ल गिरफ्तार करे गिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।