बेघर ल घर दे के भूपेश सरकार के उदीम ल सहरावत पुरस्कार के घोषणा करिस केन्द्र सरकार

अंजोर.रायपुर। आवासहीन मनला आवास देवाये म छत्तीसगढ़ शासन के सुघ्घर उदीम ल सहराइस भारत सरकार। प्रधानमंत्री आवास योजना (शहरी) के अंतर्गत छत्तीसगढ़ के मोर जमीन मोर मकान योजना के समावेशी मॉडल के प्रशंसा करत राज्य ल पुरस्कृत करे के घोषणा करे गे हावय। संग म सर्वश्रेष्ठ प्रदर्शन करइया नगरपालिका के श्रेणी म डोंगरगढ़ ल पुरस्कृत करे जाही।

भारत सरकार ह आज प्रधानमंत्री आवास योजना (शहरी) के बहुप्रतीक्षित सम्मान समारोह के घोषणा करे हावय। मिले आरो के मुताबिक एक जनवरी 2021 के प्रधानमंत्री नरेंद्र मोदी के उपस्थिति म वर्चुअल समारोह के आयोजन करे जाही, जेमा छत्तीसगढ़ राज्य ल स्पेशल कैटेगॉरी म पुरस्कृत करे जाही। समारोह म आवासन अउ शहरी कार्य मंत्री, भारत सरकार हरदीप सिंह पुरी तको उपस्थित रइही। समारोह म मोर ज़मीन मोर मकान योजना के अंतर्गत सर्वश्रेष्ठ आवास बनइया छत्तीसगढ़ के हितग्राही श्रीमती अंजू साहू (धमतरी), श्रीमती मुमताज़ बेगम (धमतरी) अउ श्रीमती ममता वर्मा (कवर्धा) ल तको सम्मानित करे जाही।

ये मउका म मुख्यमंत्री भूपेश बघेल ह राज्य के जनता, नगरीय प्रशासन विकास विभाग अउ नगरीय निकाय ल बधाई देवत बेघर मनके पक्का आवास उपलब्ध कराए के अपन प्रतिबद्धता ल दोहराये हावय। नगरीय प्रशसान अउ विकास विभाग के मंत्री डॉ शिवकुमार डहरिया ह ये उपलब्धि म प्रसन्नता व्यक्त करत विभाग, नगरीय निकाय अउ सम्मानित होवइया हितग्राही मनला बधाई दे हावय।