छत्तीसगढ़ विधानसभा के शीतकालीन सत्र के पहिली दिन दिवंगत पूर्व सदस्य ल दीस श्रद्धांजलि

अंजोर.रायपुर। छत्तीसगढ़ विधानसभा के शीतकालीन सत्र के पहिली दिन दिवंगत पूर्व सदस्य मनोज सिंह मंडावी, हीरासिंह मरकाम, पूरन लाल जांगड़े, लाल महेन्द्र सिंह टेकाम अउ घनाराम साहू के निधन म ओ मनला श्रद्धांजलि दे गिस। ये मउका म मुख्यमंत्री श्री भूपेश बघेल ह छत्तीसगढ़ विधानसभा के पूर्व सदस्य स्वर्गीय श्री हीरासिंह मरकाम ल श्रद्धांजलि देवत किहिन के श्री हीरासिंह मरकाम छत्तीसगढ़ के प्रमुख आदिवासी नेता रिहिस। ओमन गोंडवाना गणतंत्र पार्टी के स्थापना करिन अउ पूरा जीवन आदिवासी ले जुड़े मुद्दा खातिर संघर्ष करिन।

श्री बघेल ह अविभाजित मध्यप्रदेश के पूर्व सदस्य श्री पूरन लाल जांगड़े ल श्रद्धांजलि देवत किहिन के स्वर्गीय श्री जांगड़े मालखरौदा क्षेत्र ले विधायक रिहिन। ओमन समाज के शोषित, पीडि़त अउ सर्वहारा वर्ग के लोगन के अधिकार के खातिर संघर्ष करिन। स्वर्गीय श्री लाल महेन्द्र सिंह टेकाम वर्ष 2003 म छत्तीसगढ़ विधानसभा म डौंडीलोहारा विधानसभा क्षेत्र ले विधायक चुने गे रिहिसे। वो सरल, सहज अउ मिलनसार व्यक्ति रिहिस। वे क्षेत्र के विकास के खातिर सदैव प्रयासरत रिहिन। श्री बघेल ह स्वर्गीय श्री घनाराम साहू ल श्रद्धांजलि देवत ह किहिन के वो गुण्डरदेही क्षेत्र ले पहली बार निर्दलीय प्रत्याशी के रूप म चुने गिस अउ तीन बार विधायक रिहिन। सहज, सरल स्वाभाव के स्वर्गीय श्री घनाराम साहू ह संगठन म तको केऊ पद म कार्य करिन। नेता प्रतिपक्ष धरमलाल कौशिक, खाद्य मंत्री अमरजीत भगत, विधानसभा के सदस्य धरमजीत सिंह, मोहन मरकाम, केशव चंद्रा, श्री धनेन्द्र साहू अउ डॉ. रमन सिंह ह तको दिवंगत मनला सदन म श्रद्धांजलि दीस।