कोरिया अउ बलरामपुर जिला के खाद्य अधिकारी निलंबित

अंजोर.रायपुर। राज्य शासन कोति ले बिना सूचना के अनाधिकृत रूप ले अनुपस्थित रहइया दू खाद्य अधिकारी ल निलंबित कर दे गे हावय। निलंबन आदेश 15 दिसम्बर के मंत्रालय महानदी भवन ले खाद्य नागरिक आपूर्ति अउ उपभोक्ता संरक्षण विभाग कोति ले जारी करे गे हावय।

मिले आरो के मुताबिक कोरिया जिला म पदस्थ खाद्य अधिकारी गणेश राम कुर्रे ल सक्षम अधिकारी के पूर्वानुमति के बिना 3 जनवरी 2020 ले लगातार अनुपस्थित रेहे के सेती निलंबित करे गे हावय। निलंबन अवधि म गणेश राम कुर्रे के मुख्यालय खाद्य नागरिक आपूर्ति अउ उपभोक्ता संरक्षण संचालनालय नवा रायपुर अटल नगर निर्धारित करे गे हावय।

अइसने बलरामपुर जिला के खाद्य अधिकारी खुमेश्वर सिंह ल नवीन पदस्थापना जिला सुकमा म कार्यभार ग्रहण नइ करे अउ 29 अक्टूबर 2020 के जारी नोटिस के जवाब नइ दे अउ बिना सूचना लगातार अनाधिकृत रूप ले अनुपस्थित रहे के कारण निलंबित करे गे हावय। निलंबन अवधि म खुमेश्वर सिंह के मुख्यालय खाद्य नागरिक आपूर्ति अउ उपभोक्ता संरक्षण संचालनालय नवा रायपुर अटल नगर निर्धारित करे गे हावय। निलंबित खाद्य अधिकारी मनला निलंबन अवधि म नियमानुसार जीवन निर्वाह भत्ता दे जाही।