अवैध प्लाटिंग करइया मनके विरूद्ध नियमानुसार होही कार्रवाई : राजस्व मंत्री

अंजोर.रायपुर। प्रदेश के राजस्व अउ आपदा प्रबंधन मंत्री जयसिंह अग्रवाल ह कोरबा जिला मुख्यालय म आयोजित राजस्व अधिकारी मनके बइठक म अवैध प्लाटिंग करइया मनके विरूद्ध कड़ा कार्यवाही करे के निर्देश अधिकारी मनला दीस। ये बइठका म वीडियों कॉन्फ्रेंसिंग के माध्यम ले सांसद श्रीमती ज्योत्सना महंत तको शामिल होइन। 

राजस्व मंत्री ह कोरबा जिला म बनइया राष्ट्रीय राजमार्ग प्राधिकरण के सड़क अउ महत्वपूर्ण रेल परियोजना खातिर अधिग्रहित भूमि के मुआवजा प्रकरण के निराकरण करे ल किहिन। अउ नामांतरण, बंटवारा, सीमांकन, डायवर्सन आदि काम ल समय सीमा तय करके पूरा करे जाए। बैठक म राजस्व मंत्री ह किहिन के राजस्व अधिकारी अपन सूचना तंत्र सक्रिय करें अउ शहरी क्षेत्र म होए वाला अवैध प्लाटिंग म विशेष नजर रखें। अवैध प्लाटिंग के विरूद्ध कड़ा कार्यवाही करे के निर्देश देवत ओमन किहिन के अवैध प्लाटिंग ल रोके ले एक डहर शासन ल होवइया राजस्व हानि ल बचाये जा सकही अऊ दूसर कोति वाजिब दाम म हाउसिंग बोर्ड, नगर निगम जइसे शासकीय संस्था के मकान बेचाही अउ लोगन बेवजह के परेशानी ले तको बांचही। राजस्व मंत्री ह कोरबा जिला म राष्ट्रीय राजमार्ग प्राधिकरण के सड़क अउ प्रस्तावित रेल परियोजना खातिर अधिग्रहित करे भूमि के मुआवजा वितरण तेज करे के निर्देश अधिकारी ल दिस। 

बइठक म कोरबा जिला के कलेक्टर श्रीमती कौशल ह बताइन के जिला के 117 मसाहती गांव म ले 112 गांव के मौका सत्यापन पूरा होगे हावय। 91 गांव के नक्शा आईआईटी रूड़की ले रि-नंबरिंग के खातिर मिले हावय जेमा ले 59 गांव के सीमा सत्यापन अउ री-नंबरिंग करके नक्शा वापस आईआईटी रूड़की ल पठोय गे हाबे। बइठका म मध्य क्षेत्र आदिवासी विकास प्राधिकरण के उपाध्यक्ष अउ कटघोरा विधायक पुरूषोत्तम कंवर, पाली-तानाखार के विधायक मोहित केरकेट्टा, अपर कलेक्टर श्रीमती प्रियंका महोबिया सहित तीनों अनुभाग के एसडीएम, तहसीलदार अउ नायब तहसीलदार तको शामिल होइन।