अंजोर.मरवाही। छत्तीसगढ़ के मरवाही विधानसभा म होए उपचुनाव म जनता ह अपन भरपूर समर्थन देवत ए दरी डॉ के. के ध्रुव ल विधायक चुने हाबे। जानबा होवय के ए सीट म पाछू 18 साल ले जोगी जी रिहिसे अउ पाछू दिन ओकर निधन होए के बाद खाली होगे रिहिस। वइसे तो अभी चुनावी नतीजा के आधिकारिक औपचारिकता भर बांचे हावय अउ जीत पूरा पक्का हावय।
लोगन के रूझान तो ए दरी भूपेश सरकार कोति दिखते रिहिस अउ मतगणना ले मिले बड़त ये बात अउ पक्का कर दीस के मरवाही के जनता ह डॉ के. के ध्रुव उपर भरोसा जताये हाबे। एजेंसी ले मिले आरो के मुताबिक मरवाही सीट म कुल आठ उम्मीद्वार मैदान म रिहिसे जेमा डॉ. गंभीर सिंह भाजपा, डॉ. के.के. ध्रुव कांग्रेस, उर्मिला मार्को, रितु पेंद्राम, वीर सिंह नागेश, लक्ष्मण पोर्ते अउ सोनमति सलाम।
मतगणना म डॉ. के.के. ध्रुव कांग्रेस ल 71856 वोट अउ डॉ. गंभीर सिंह भाजपा ल 39681 वोट मिले हाबे। जोगी के गढ़ माने जाने वाला मरवाही सीट म पहिली ही जोगी परिवार के उम्मीद्वारी खतम होगे रिहिस अऊ जेन ल ओमन समर्थन दिस तेने नइ जीत सकिस, माने जोगी परिवार अपन किला ल एसो नइ बचा सकिन। खैर ये तो जनता के अउ जनप्रतिनिधी के बीच के बात आए। डॉ. के.के. ध्रुव के जीत ले कांग्रेस पार्टी म गजब उच्छाह दिखत हाबे। मुख्यमंत्री भूपेश बघेल, गृहमंत्री ताम्रध्वज साहू अउ जयसिंह अग्रवाल सहित सबो आन मंत्री मन तको के.के. ध्रुव ल बधाई दे हाबे।
मुख्यमंत्री भूपेश बघेल - ‘मरवाही के उपचुनाव महज विधायक चुने के चुनाव नी रिहिसे बल्कि येहा मरवाही के साथ बीते 18 साल तक होए छल ल जनता कोति ले लोकतांत्रिक जवाब दे के परीक्षा रिहिस। मोला खुशी हावय के मरवाही के जनता ह ये परीक्षा ल प्रचंड बहुमत ले उत्तीर्ण करे हावय। डॉ के. के ध्रुव जी ल बधाई अउ शुभकामनाएं।'
गृहमंत्री ताम्रध्वज साहू - ‘मरवाही विधानसभा के उपचुनाव म कांग्रेस प्रत्याशी डॉ.के.के ध्रुव जी ल भारी मत ले विजयी होए म हार्दिक बधाई अउ शुभकामनाएं। मरवाही विधानसभा के सबो मतदाता मनके हृदय ले आभार अउ धन्यवाद, जेमन कांग्रेस के जन-कल्याण के नीति के प्रति अपन विश्वास जताय हाबे।'
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।