मानव सेवा के प्रतिमूर्ति स्वामी आत्मानंद जी के नाव म बने पुष्प वाटिका अउ स्व. सुखचैन लाल भाले के प्रतिमा के पाटन म अनावरण

अंजोर.दुर्ग। प्रदेश के मुख्यमंत्री भूपेश बघेल ह गांव के किसान मनके आर्थिक विकास के संगे-संग पुरखा के सरेखा खातिर तको बेराबेरा म उदीम करते रिथे। पाछू दिन राजगीत के रचयिता डॉ. नरेन्द्र देव वर्मा के जयंती मनाइन। आज मानव सेवा के प्रतिमूर्ति स्वामी आत्मानंद के नाव म बने दुर्ग जिला के तहसील मुख्यालय पाटन के स्वामी आत्मानंद पुष्पवाटिका सौंदर्यीकरण के बाद लोकार्पण कार्यक्रम म सामिल होइन। ये मउका म स्वामी आत्मानंद चौक के जीर्णाद्धार के बाद ओकर लोकार्पण के संग एसडीएम, तहसील कार्यालय के लोकार्पण अउ नवा भवन निर्माण के भूमि-पूजन तको होइस। आगू मुख्यमंत्री जी ह पाटन म स्वर्गीय श्री सुखचैन लाल भाले के प्रतिमा के अनावरण तको करिन।