अंजोर.जशपुर। नालको स्मेल्टर कंपनी अंगूल के 2 ट्रक 16-16 लाख रूपिया के एल्युमिनियम तार लोड करके उत्तरप्रदेश के कानपुर अउ चंदोली जाए बर निकले रिहिस। रात के जशपुर के कुनकुरी तपकरा मार्ग म कसजोरा नाला के पास पहुंचिस तभे पाछु कोति ले बोलेरो म 3 आदमी आगे ट्रक चालक ल बंधक बनाके मोबाईल अउ नगदी लूट लिस अउ ट्रक लेके फरार होगे। घटना के रिपोर्ट ड्रायवर निवारण साहू कोति ले थाना कुनकुरी म करे गिस।
पुलिस आरोपी मनके तलाश करे खातिर बड़का अधिकारी के मार्गदर्शन म टीम बनाके झारखण्ड रवाना करिन। जांच म आरो मिलिस के ट्रक पुंदाग रांची (झारखण्ड) के टोल नाका ले पार होगे, तुरते झारखण्ड पुलिस अधिकारी ल आरो करे गिस अउ हजारीबाग स्थानीय पुलिस के मदद ले घेराबंदी करके आरोपी ल पकड़े गिस। लूटे ट्रक के कीमत 18 लाख अउ माल (एल्युमिनियम सामग्री) दू ट्रक म लदे कीमत 32 लाख संग एक देसी कट्टा अउ एक चाकू तको बरामद करे गिस एक आरोपी सहित। आरोपी के नाम सुमंतो साहू पिता राजकिशोर साहू, उम्र 37 साल साकिन पाटोली डिपो थाना नाकटी देउल जिला-सम्बलपुर बताये हाबे अऊ आगू पूछताछ जारी हाबे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।