अंजोर.अम्बिकापुर। जिला म धान के मिंजाई शुरू होते किसान मन कोति ले गौठान खातिर पैरादान के बुता तको सुरू होगे हाबे। बड़े किसान मन गौठान खातिर पैरादान करत सीधा ट्रेक्टर ले पैरा पहुंचा के देवत हाबे। क्षेत्र के जनप्रतिनिधि मन तको अपन क्षेत्र के गोठान म बढ़ चढ़के पैरादान करत हाबे।
एजेंसी ले मिले आरो के मुताबिक अब तक जिला के गोठान म किसान मन कोति ले 200 ट्रेक्टर पैरादान करे जा चुके हाबे। जेमा अम्बिकापुर जनपद के गोठान म 14 ट्रॉली, लखनपुर जनपद म 92 ट्रॉली, उदयपुर जनपद म 33 ट्रॉली, लुण्ड्रा जनपद म 13 ट्रॉली, सीतापुर जनपद म 20 ट्रॉली, बतौली जनपद म 17 ट्रॉली अउ मैनपाट जनपद म 13 ट्रॉली पैरादान सामिल हाबे। उदयपुर जनपद के ठिठिर दास कोति ले सबले जादा 12 ट्रॉली सरगवां गोठान म पैरादान करे गे हावय। अइसने 5-5 ट्रैक्टर ट्रॉली पैरादान करइया म लुण्ड्रा जनपद सदस्य त्रिलोकी सिंह, उदयपुर जनपद के बंधन, बतौली जनपद के संजू राम, राजेश्वर मिंज सामिल हाबे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।