Home News Contact About
'अंजोर ' छत्तीसगढ़ी मासिक पत्रिका वेब संस्करण ---- anjore.cg@gmail.com

समर्थन मूल्य म धान खरीदी 01 दिसम्बर ले सुरू होही

अंजोर.रायपुर। छत्तीसगढ़ म धान उत्पादक किसान ले समर्थन मूल्य म धान खरीदी एक दिसम्बर ले सुरू होही। राज्य सरकार कोति ले सबो तैयारी होगे हाबे। मुख्यमंत्री श्री भूपेश बघेल ह अधिकारी मनला निर्देश दे हावय के धान खरीदी बखत किसान ल कोनो प्रकार के असुविधा नइ होना चाही। किसान मनके सहूलियत के पूरा ध्यान रखे जाए। मुख्यमंत्री के अध्यक्षता म आयोजित केबिनेट के बइठक म समर्थन मूल्य म धान खरीदी 01 दिसम्बर ले 31 जनवरी 2021 तक अउ मक्का के खरीदी 01 दिसम्बर ले 31 मई 2021 तक करे निर्देश हावय। 01 दिसम्बर ले प्रदेश म 2 हजार 305 धान खरीदी केन्द्र म समर्थन मूल्य म धान खरीदी सुरू होही। एसो 257 नवा धान खरीदी केन्द्र बनाए गे हावय। 

राज्य सरकार के किसान हितैषी नीति ले खेती-किसानी छोड़े 2 लाख ले आगर किसान खेत तनि फेर लहुंटे हावय, जेकर ले खेती के रकबे बाढ़हे हावय। खरीफ विपणन वर्ष 2020-21 म पाछू साल के तुलना म 2 लाख 49 हजार ज्यादा किसान ह धान बेचे खातिर पंजीयन कराये हावय। एसो समर्थन मूल्य म धान बेचे खातिर कुल 21 लाख 29 हजार 764 किसान ह पंजीयन कराये हावय। किसान मनके बोये गे धान के रकबा 27 लाख 59 हजार 385 हेक्टेयर ले अधिक हावय। दू साल म धान बेचइया किसान के रकबा 19.36 लाख हेक्टेयर ले बढ़के 22.68 लाख हेक्टेयर अउ किसान के संख्या 12 लाख 6 हजार ले बढ़के 18 लाख 38 हजार होगे हावय। ये प्रकार ले रकबे म 3 लाख 32 हजार हेक्टेयर अउ समर्थन मूल्य म धान बेचइया किसान के संख्या म 6.32 लाख बढ़ोत्तरी होए हावय।

सरकार कोति ले भले किसान मन खातिर सरी सुविधा के बात केहे हावय फेर ये तो 1 दिसंबर के बादे आरो मिलही के कतका योजना म उंकर निर्देश के पालन होहे। काबर के किसान मन ल तो पाछु साल के जेन मुल्य सरकार तय करे रिहिसे ओला, किश्त-किश्त  म देवत हाबे। पाछू सरकार के मूल्य के हिसाब ले देखे जाए तव किसान मनला तभो फायदा हावय, शायद इही सेती किसान मन चुप हावय। वैसे अभी किसान मनके खेत के फसल ल देखे जाए तव मिंजई के हिसाब ले धान खरीदी ह पिछवागे हावय। कतकोन किसान मन नवंबर म धान मिंजई करके बेचे के अगोरा म हावय।

कोई टिप्पणी नहीं:

टिप्पणी पोस्ट करें

जोहार पहुना, मया राखे रहिबे...

किस्सा कहिनी

Contact Us

नाम

ईमेल *

संदेश *

कला-संस्कृति-साहित्य

follow us

T-Twitter | F-Facebook | Y-Youtube | Instagram | Pinterest
महतारी भाखा के उरउती खातिर भारत के समाचार पत्र के पंजीयक कार्यालय नई दिल्ली म पंजीकृत ' अंजोर ' छत्तीसगढ़ी मासिक पत्रिका के anjor.online वेब संस्करण म छत्तीसगढ़ी बुलेटिन, किस्सा-कहानी अउ कला-मनोरंजन संग सोशल मीडिया के चारी, कुछ आन भाखा के अनुवाद समोखे, छत्तीसगढ़ के जन भाखा म जन-जन तक बगराथन। जुड़व ये उदीम - anjore.cg@gmail.com

सियानी गोठ

भारत के समाचारपत्रों के पंजीयक का कार्यालय नई दिल्ली
पंजीकरण संख्या-: CHHCHH/2014/56285