जवाहर बाजार, बूढ़ा तालाब म्यूजिकल फाउंटेन अउ सिटी कोतवाली थाना भवन के मुख्यमंत्री श्री बघेल करिस लोकार्पण

अंजोर.रायपुर। राजधानी रायपुर के बड़का अउ जुन्ना बाजार के नवा रूप म आज लोकार्पण होगे। जानबा होवय के जवाहर बाजार ऐतिहासिक व्यवसायिक परिसर के नवनिर्माण अउ जीर्णोद्धार रायपुर स्मार्ट सिटी लिमिटेड कोति ले लगभग 23 करोड़ 75 लाख रूपिया के लागत म करे गे हवय। जीर्णोद्धार म जुन्ना ऐतिहासिक मुख्य द्वार ल जस के तस राखत ओला संवारे गे हावय। जेनला आज प्रदेश के मुखिया भूपेश बघेल ह व्यपारी अउ जनता ल समर्पित करिस। अइसने राजधानी रायपुर म नागरिक सुविधा ले जुड़े लगभग 33 करोड़ 25 लाख रूपिया के लागत के 6 अऊ बुता के लोकार्पण करत राजधानी वाला मनला सौगात दीस। जेमा 3 करोड़ 28 लाख रूपिया लागत ले बने देवेन्द्र नगर ग्लोबल चौक, सड़क चौड़ीकरण कार्य, लगभग 2 करोड़ 52 लाख रूपिया के लागत ले आक्सीजोन स्मार्ट रोड म कराए कार्य, लगभग 75 लाख रूपिया के लागत ले कलेक्टोरेट उद्यान म जन सुविधा के उन्नयन कार्य अउ लगभग 6 करोड़ रूपिया के लागत ले बने सिटी कोतवाली थाना भवन अउ बूढ़ा तालाब म लगाए म्यूजिकल फाउंटेन तको शामिल हावय। 

ये मउका म प्रदेश के गृहमंत्री ताम्रध्वज साहू, कृषि मंत्री रविन्द्र चौबे, वनमंत्री मोहम्मद अकबर, नगरीय प्रशासन मंत्री डॉ. शिवकुमार डहरिया, विधायकगण सर्वश्री सत्यनारायण शर्मा, कुलदीप जुनेजा, विकास उपाध्याय, नगर निगम रायपुर के महापौर एजाज ढेबर, सभापति प्रमोद दुबे, नगर निगम के पार्षद, मुख्य सचिव आर.पी. मंडल, रायपुर कलेक्टर डॉ. एस.भारतीदासन, नगर निगम कमिश्नर सौरभ कुमार मन तको उपस्थित रिहिन।