छॉलीवुड। सिनेमा ह अभी घलोक कोरोना के मार झेलत हाबे, हालाकि सिनेमाघर खुलत हाबे तभो ले बने दिन आए म अभी अऊ बेरा लगही। कलाकार मन आर्थिक संकट के बीच कुछ काम सुरू करत हाबे। इही ओढ़र म एक नवा उदीम करिन छत्तीसगढ़ी फिलिम जोहार छत्तीसगढ़ के प्रोड्यूसर मन ह। फिल्म जोहार छत्तीसगढ़ ह कोरोना अनलॉक के बाद दूबारा फेर श्याम टाकीज म लगिस। अउ येकर 50 दिन पूरा होए के सेती जोहार छत्तीसगढ़ के टीम ह श्याम टाकीज म जलसा के आयोजन करिन।
कार्यक्रम म विशेष रूप ले पहुना के रूप म श्रीमती शकुन डहरिया प्रदेश महिला कांग्रेस, अमित साहू भाजयु प्रदेश अध्यक्ष, प्रोड्यूसर संतोष जैन, मोहन सुंदरानी, लाभांश तिवारी, क्षमानिधी मिश्रा, जनता जोगी कांग्रेस के ऐवज देवांगन अउ छत्तीसगढ़िया क्रांति सेना के सेनानी मनके अलावा जेमा सिने जगत ले जुरे तमाम लोगन मन जुरियाइन।
फिल्म जोहार छत्तीसगढ़ मूल छत्तीसगढ़िया मनके अधिकार अउ शोषण के कहानी म बने हावय। फिल्म के निर्माता राज साहू अउ निर्देशक हावय देवेन्द्र जांगड़े। जेमा देवेंद्र जांगड़े, शिखा चितांबरे, राज साहू, सोनाली सहारे, अनिल शर्मा, पुष्पेन्द्र सिंह, निशांत उपाध्याय, क्रांति दीक्षित, हेमलाल कौशल, विक्रम राज, सलिम अंसारी, उपासना वैष्णव आदि दमदार भूमिका निभाये हाबे।
पाछू पइत ये फिलिम ह जबरदस्त सुरूआत करत सिनेमाघर 31 जनवरी के रिलीज होए रिहिसे। लोगन मन गजब मन करिन अउ निर्माता निर्देशक संग कलाकार मनला तको मया आसिस दीस। अब दूबारा कोरोना अनलॉक के बाद सिनेमाघर म फिलिम लगे के खुशी अउ 50 दिन पूरा करे उच्छाह ले कही जादा कलाकार मन घर ले बाहिर निकल के एक दूसर ले मेल मुलाकात करिन ये सबले बड़का खुशी के बात आए।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।