गलीचा बुनकर मनके पारिश्रमिक म होही 10 प्रतिशत के बढ़ोत्तरी, खाद्य मंत्री करिस शबरी एम्पोरियम के निरीक्षण

अंजोर.अम्बिकापुर,8। छत्तीसगढ़ शासन के खाद्य, नागरिक आपूर्ति अउ उपभोक्ता संरक्षण मंत्री अमरजीत भगत ह आज मैनपाट के कमलेश्वरपुर म छत्तीसगढ़ हस्तशिल्प विकास वोर्ड कोति ले चलत शबरी एम्पोरियम अउ गलीचा निर्माण के जायजा लिस। ये मउका म ओमन गलीचा बुनकर मनके समस्या सुनत उंकर मांग म 10 प्रतिशत तक पारिश्रमिक म वृद्धि करे तुरते निर्देश विभाग के अधिकारी मनल दिस। मंत्री श्री भगत किहिन के मैनपाट के गलीचा देश-विदेश म प्रसिद्ध हावय। येकर महत्ता ल बनाए रखे खातिर गलीचा बुनाई केन्द्र ल जीवित रखे बर परही। स्थानीय स्तर म ही लोगन ल गलीचा बुनाई के काम मिलही तव बनारस जाए के नौबत नइ आही। संगे-संग बुनकर मनके सुविधा ल अऊ बढ़ाये के जरूरत हाबे।

हस्तशिल्प बोर्ड के प्रबंधक कोति ले मिल आरो के मुताबिक वर्तमान म गलीचा बुनाई केन्द्र मैनपाट म 10 बुनकर मन गलीचा बनुत हाबे। अउ बुनकर मनके रेहे, खाए के बेवस्थाल केन्द्र् म ही करे गे हावय। इहां तीन बाई छः, चार बाई छः अउ छः बाई नौ साईज के गलीचा बनाये जात हाबे। अम्बिकापुर ले फिनिशिंग होए के बाद रायपुर भेजे जाही।