सीतापुर छत्तीसगढ़ स्टेट वेयर हाउसिंग के नवा खाद्यान्न गोदाम के उद्घाटन करिन खाद्य मंत्री श्री भगत

अंजोर.अम्बिकापुर,22। छत्तीसगढ़ शासन के खाद्य, नागरिक आपूर्ति अउ उपभोक्ता संरक्षण मंत्री अमरजीत भगत ह आज सीतापुर विकासखंड के ग्राम बनेया म छत्तीसगढ़ स्टेट वेयर हाउसिंग के नवा बने 10800 मेट्रिक क्षमता के गोदाम के उद्घाटन फीता काटके करिन। ये गोदाम ह लोक निर्माण विभाग डहर ले 5 करोड़ 50 लाख रुपिया के लागत ले बने हाबे।

ये मउका म ओमन किहिन के 10 हजार 800 मैट्रिक टन खाद्यान्न भंडारण गोदाम के बने ले अब जिला म खाद्यान्न भंडारण के क्षमता म बड़ोत्तरी अउ सहुलियत होही। वेयर हाउस के बने ले चाउर के रख-रखाव बने ढंग ले करे जा सकही अउ आस-पास के राईस मिल के चाउर तको इही वेयर हाउस म रखे जाही। संगे-संग वेयर हाउस के भंडारण म आस-पास के लोगन ल रोजगार तको मिलही। आगू ओमन किहिन के 27 अउ 28 अक्टूबर के होवइया विधानसभा के विशेष सत्र म केन्द्र सरकार के कृषि बिल म चर्चा करे जाही। हमन कोनो किसान के अहित नइ होवन देवन।