बकोई के सोनसाय ल मिलिस शासन के योजना के दोहरा लाभ, दू फसली खेती ले बनगे प्रगतिशील किसान

अंजोर.अम्बिकापुर,21। मेहनत करइया हाथ ल जब कोनो के सहारा मिलथे तव उंकर दिन बहुरत देरी नइ लागय। ये बात के मिसाल बनिस सोनसाय जेन शासन के योजना के लाभ लेवत मनरेगा ले कुंआ निर्माण अउ क्रेडा ले सोलर पंप पाके बरसात के पानी ले आत्मनिर्भर होके दू फसली खेती करत अब प्रगतिशील किसान बनगे हावय। एजेंसी ले मिले आरो के मुताबिक जनपद पंचायत उदयपुर ले करीब 40 किलोमीटर दूरिहा पहाड़ी के तिर ग्राम पंचायत बकोई के सोनसाय अपन पुश्तैनी जमीन म बरसात के भरोसा खेती करत रिहिसे। 

किसान सोनसाय ह अपन खेत म मनरेगा ले कुआं बइवाइस 2 लाख 3 हजार के लागत ले। बाद म खेत अउ बाड़ी म पानी पलोय बर ओमन ला क्रेड़ा कोति ले सब्सिडी म सोलर पंप के सुविधा मिलगे। अब सोन साय धान के साथ सब्जी के खेती भी करत हाबे। जानबा होवय के ग्राम पंचायत बकोई दुर्गम पहाड़ी क्षेत्र म हावय ए सेती पानी के किल्लत रिथे। गर्मी के समय हैंडपम्प, तालाब म पानी कम होथे। सिंचाई के कोनो साधन नी होए के सेती धान के फसल अच्छ नइ हो पावत रिहिसे। अइसे म मनरेगा गांव म रोजगार उपलब्ध कराके ओमन ला आर्थिक रूप ले मजबूत करत हाबे।