होम आईसोलेशन के मरीज के देखरेख खातिर अब जिला स्तरीय कंट्रोल रूम बनये गिस दिग्विजय स्टेडियम ल

अंजोर.राजनांदगांव,13। जिला म कोरोना के बाढ़त मरीज ल देखत, बने आदमी मनला होम आईसोलेशन के लाभ दे गे हावय। मरीज मनला फोन ले बेरा-बेरा म सुझाव अउ परामर्श देवत रिथे। अउ ये बात के निगरानी मुख्य चिकित्सा अउ स्वास्थ्य अधिकारी कार्यालय के कंट्रोल रूम होवत रिहिसे जेला अब ले दिग्विजय स्टेडियम म स्थानांतरित कर गे हावय। मिले आरो के मुताबिक महापौर श्रीमती हेमा देशमुख अउ कलेक्टर टोपेश्वर वर्मा ह संयुक्त रूप ले जिला स्तरीय कंट्रोल रूम के निरीक्षण करिन। होम आईसोलेशन के मरीज बर एक अलग नम्बर 7440203333 तको जारी करे हावय।

होम आईसोलेशन के मरीज मनला निर्धारित प्रपत्र म अनिवार्य रूप ले अंडरटेकिंग देना होही। अंडरटेकिंग के अवहेलना करे म महामारी एक्ट के प्रावधान के तहत कानूनी कार्रवाई करे जाही। होम आईसोलेशन के मरीज ल कोनो एमबीबीएस, चिकित्सक ले टेलीफोनिक उपचार अउ स्वास्थ्य देखभाल खातिर निर्धारित प्रपत्र म सहमति देना होही। होम आईसोलेशन के मरीज ल अपन मोबाईल म 'आरोग्य सेतु एप’ डाउनलोड करके 24 घंटे एप म नोटिफिकेशन अउ लोकेशन (जीपीएस ट्रैकिंग) चालू रखना होही। परिवार म कोनो सदस्य कोरोना संक्रमित हावय अउ परिवार म 55 वर्ष ले जादा उम, गर्भवती महिला, गंभीर बीमारी जइसे कैंसर, डायबिटीज, उच्च रक्तचाप, अस्थमा, हृदय रोग, गुर्दा के बीमारी ले पीडि़त सदस्य हावय तव ओमनला कोरोना संक्रमित मरीज ले दूरिहा रखें या उंकर बर आन घर म रूके के बेवस्था करे। ये मउका म महापौर अउ कलेक्टर के अलावा अशोक फडऩवीस, एस.डी.एम. मुकेश रावटे, मुख्य चिकित्सा अउ स्वास्थ्य अधिकारी डॉ. मिथलेश चौधरी, जिला कार्यक्रम प्रबंधक गिरीश कुर्रे, सीटी प्रोग्राम मैनेजर सुश्री अनामिका बिश्वास, जिला एपिडिम्योलाजिस्ट सुश्री प्रेरणा सहगल अउ स्वास्थ्य विभाग के प्रणय शुक्ला, विकास राठौर, अखिलेश नारायण सिंह मन उपस्थित रिहिन।