बाढ़त महिला अपराध ल देख सीएम बघेल लिस गृह विभाग के बइठका, कोताही बरतइया पुलिस अधिकारी उपर होही कार्यवाही

अंजोर.रायपुर,14। महिला अपराध के मामला म शांत अउ सुरक्षित माने जाने वाला छत्तीसगढ़ प्रदेश तको अब महिला अपराध के सेती शर्मसार होवत हाबे। बड़े शहर के संग छोटे-छोटे कस्बा म तको नोनी मन संग छेड़छाड़ अउ हत्या के मामला आगू आए के बाद प्रदेश के मुखिया भूपेश बघेल ह आज निवास कार्यालय म समीक्षा बइठका रखे रिहिन। गृहमंत्री अउ डीजीपी के उपस्थिति म मुख्यमंत्री श्री बघेल किहिन के महिला मनके विरूद्ध घटित अपराध के मामला म लापरवाही बरतइया पुलिस अधिकारी अउ कर्मचारी ल बर्दाश्त नी करे जाए, सख्त ले सख्त कार्यवाही करे जाही। 

मुख्यमंत्री ह पुलिस महानिदेशक ल निर्देश तको दे हावय के महिला अपराध के रोकथाम बर राज्य स्तर म सतत मॉनिटरिंग अउ समीक्षा करे जाए। येकर बर एसओपी बनाये जाए अउ पुलिस मुख्यालय सीधा महिला के विरूद्ध गंभीर अपराध के समीक्षा करय। ओमन आगू किहिन के सबो जिला म अइसन अपराध के रोकथाम बर विशेष जांच दल के गठन करे जाए। पुलिस महानिदेशक डी.एम अवस्थी ह बैठक म बताइन के सबो जिला के पुलिस अधीक्षक ल वीडियो कॉन्फ्रेंसिंग के माध्यम ले महिला के विरूद्ध अपराध म अंकुश रखे अउ अइसन मामला के तत्परता ले जांच करे के निर्देश दिए हावय। ये बइठका म अपर मुख्य सचिव गृह सुब्रत साहू, संचालक लोक अभियोजन प्रदीप गुप्ता, रायपुर रेंज के पुलिस महानिरीक्षक डॉ. आनंद छाबड़ा, उप पुलिस महानिरीक्षक सुशील द्विवेदी, मुख्यमंत्री सचिवालय के उप सचिव सुश्री सौम्या चौरसिया सहित पुलिस विभाग के बड़का अधिकारी उपस्थित रिहिन।