शासकीय उच्चतर माध्यमिक विद्यालय पड़ियाईन ल स्व. श्री धनुष राम लोधी के नाम म करे के निर्देश

अंजोर.मुंगेली,23। मुंगेली जिला कलेक्टर कोति ले कलेक्टोरेट म आयोजित बइठका म कई प्रकरण के निराकरण के बाद येहू बात के निर्देश दे गिस के मुंगेली जिला के विकासखण्ड पथरिया के ग्राम पड़ियाईन के स्व. धनुष राम लोधी के परिजन मन शासकीय उच्चतर माध्यमिक विद्यालय पड़ियाईन खातिर लगभग 5 एकड़ जमीन दे हावय। अउ ओमन के मांग तको रिहिस ए सेती शासकीय उच्चतर माध्यमिक विद्यालय पड़ियाईन के नाम स्व. धनुष राम लोधी नाम म करे खातिर पथरिया तहसील के अनुविभागीय अधिकारी राजस्व ल निर्देश दिये गे हावय।

बइठका म आगू कलेक्टर श्री एल्मा ह किहिन के कोविड-19 के संक्रमण ले बचाव अउ रोकथाम बर लघियात दवई आही अउ हर आदमी तक पहुंचही, तब तक अपन धियान राखव। ओमन राज्य शासन के महत्वाकांक्षी योजना नरवा, गरूवा, घुरूवा, बारी योजना के तहत जिला म बने गोठान मनके रख-रखाव, फैंसिंग, शेड़ निर्माण वर्मी कम्पोस्ट खाद अउ क्रेडा विभाग के सौर सूजला योजना के तको आरो लिस। ये मउका म जिला पंचायत के मुख्य कार्य पालन अधिकारी श्रीमति नुपूर राशि पन्ना, सबो अनुभाग के अनुविभागीय अधिकारी राजस्व अऊ आन बड़का अधिकारी मन जुरियाए रिहिन।