गोबर के दीया ले जगमगाही एसो के दसरहा अउ देवारी, स्व-सहायता समूह मन बनाये हाबे रंग-बिरंग के दीप

अंजोर.रायपुर,23। न दिल्ली, न चाइना अउ न ही आगरा, एसो तो दसरहा अउ देवारी म रायपुर जगमगाही बिहान म बने गोबर के दीया ले। कोरोना राई काहव या लोगन के जागरूकता अब लोकल कोति लोगन के सुध लामत हाबे। अब कतकोन जिनिस ल लोगन मन बिसाये ले बने तो घरे म बना डारत हाबे। येमा स्व-सहायता समूह के दीदी मन तको जबर बुता करत हाबे। आरो मिले हाबे के ओमन गोबर ले आनी-बानी के दीया बनाये हाबे, जेन अब बजार म बेचाही।

 

जानबा होवय के राज्य सरकार राष्ट्रीय अजीविका मिशन (एनआरएलएम) के माध्यम ले महिला मनला जोड़के ओमन ला आत्मनिर्भर बनाये अउ महिला सशक्तिकरण के दिशा म जबर बुता होवत हाबे। कोरिया जिला के बिहान के महिला मन गोबर ले रंग-बिरंग के सुघ्घयर दीय बनाये हाबे। येकर अलावा माटी के कलश तको बनावत हाबे। बिहान के दीदी मन लोगन के मांग अउ बाजार ल देखत गोबर अउ माटी ले दीपक, ओम, श्री, स्वास्तिक, शुभलाभ, फूल आरती दीया अउ कलश बनाये हाबे।