कांकेर म पत्रकार संग होए मारपीट के घटना म जांच समिति मुख्यमंत्री ल सउपिन रिपोर्ट, चार बिन्दु म करे हावय सिफारिश

अंजोर.रायपुर,10। कांकेर के पत्रकार कमल शुक्ला जी अउ सतीश यादव संग होए 26 सितंबर के घटना म राज्या शासन ह जांच खातिर पत्रकार मनके उच्च स्तरीय समिति बनाये रिहिस। ओमन आज मुख्यमंत्री भूपेश बघेल ले मुलाकात करत अपन रिपोर्ट सउपे हाबे। जांच दल के अध्यक्ष राजेश जोशी, संपादक नवभारत रायपुर के संग सदस्य अनिल द्विवेदी, सम्पादक आज की जनधारा रायपुर,  सुरेश महापात्र सम्पादक बस्तर इम्पेक्ट दंतेवाड़ा, सुश्री शगुफ्ता शीरीन सहायक संपादक, राष्ट्रीय हिन्दी मेल अउ रूपेश गुप्ता संवाददाता स्वराज्य एक्सप्रेस रायपुर जी मन ह मुख्यमंत्री ल 16 पेज के जांच रिपोर्ट अउ 450 पेज के आन दस्तावेज सउपे हावय। मामला के गंभीरता ल देखत मुख्यमंत्री ह बस्तर के पुलिस महानिरीक्षक ल जांच रिपोर्ट भेजत, परीक्षण करके आवश्यक कार्रवाई करे के निर्देश दे हावय।

पत्रकार जांच समिति ह 6 बिंदु म जांच करे हावय जेमा घटना का होइस, घटना के पृष्ठभूमि, सबो पक्ष के संलिप्तता अउ भूमिका, एफआईआर अउ घटना के तथ्यात्मकक विश्लेषण, पुलिस अउ प्रशासन के भूमिका, पब्लिक डोमेन म उपलब्धता सबो आरोप के पड़ताल प्रमुख रिहिन। जांच समिति ह अपन रिपोर्ट म 4 बिंदु के सिफारिश तको करे हावय जेमा 1. सतीश यादव अउ कमल शुक्ला संग होए मारपीट के घटना गंभीर किस्म के आए, खास करके कमल शुक्ला संग तो कुछ भी हो सकत रिहिसे, ये बात ल धियान म राखत मामला म अऊ गंभीर धारा लगाये जाए। 2. पुलिस ह ये मामला ल काबू करे म पूरा विफल होए हाबे, पुलिस अधीक्षक के घटना स्थल म नइ पहुंचना उंकर संवेदनशीलता ल लेके गंभीर सवाल खड़ा करथे। 3. पत्रकार सुरक्षा कानून ल लघियात लागू करे के प्रयास होना चाही। अऊ 4. ये पूरा घटनाक्रम ल देखे म अइसे लागथे के कमल शुक्ला अउ सतीश यादव के खिलाफ आरोपी मन थाना म एफआईआर अपन बचाव खातिर करवाये हाबे।