पुलिस मुख्यालय म स्थापित राज्य साइबर पुलिस थाना के मुख्यमंत्री अउ गृहमंत्री करिन शुभारंभ

अंजोर.रायपुर,2। मुख्यमंत्री भूपेश बघेल ह वीडियो कॉन्फ्रेंस ले आज पुलिस मुख्यालय म स्थापित राज्य साइबर पुलिस थाना के शुभारंभ करिन। ओमन ये मउका म पुलिस विभाग ल बधाई देवत किहिन के राज्य म होवइया साइबर अपराध के नियंत्रण खातिर पुलिस विभाग के बने पहल हावय। येकर ले सबो साइबर अपराध ल तेजी ले सुलझाये म सहायता मिलही। संग म आन पुलिस थाना ल तको साइबर अपराध के अनुसंधान म जरूरी मार्गदर्शन अउ तकनीकी मदद मिलही। 

मुख्यमंत्री ह वीडियो कॉन्फ्रेंस ले राज्य साइबर पुलिस थाना के मुआयना तको करिन। उंकर संग ऑनलाइन शुभारंभ कार्यक्रम म गृहमंत्री ताम्रध्वज साहू, मुख्यमंत्री अउ गृह विभाग के अपर मुख्य सचिवसुब्रत साहू, विशेष पुलिस महानिदेशक आर.के. विज अउ चिप्स के मुख्य कार्यपालन अधिकारी समीर बिश्नोई तको मौजूद रिहिन। उहें पुलिस मुख्यालय ले वीडियो कॉन्फ्रेंस ले पुलिस महानिदेशक डी.एम. अवस्थी, विशेष पुलिस महानिदेशक अशोक जुनेजा अउ अतिरिक्त पुलिस महानिदेशक हिमांशु गुप्ता तको कार्यक्रम म शामिल होइन।

मुख्यमंत्री श्री बघेल ह शुभारंभ कार्यक्रम ल संबोधित करत किहिन के पुलिस मुख्यालय के ये साइबर थाना लोगन साइबर अपराध के प्रति लगातार जागरूक करे, जेकर ले ओमन सोशल मीडिया के माध्यम ले घटत अपराध अउ वित्तीय धोखाधड़ी के शिकार ले बांच सकय। आगू ओमन स्कूल, कॉलेज, विकासखंड अउ पंचायत स्तर तक जाके नागरिक मनला जागरूक करे बर तको किहिन। ये मउका म गृहमंत्री श्री साहू ह कार्यक्रम म किहिन के रोजमर्रा के जीवन म इंटरनेट अउ तकनीक के उपयोग बढ़त हावय। अउ सुविधा के संग आपराधिक प्रवृत्ति के लोगन म येकर दुरुपयोग तको करत हाबे। अब जांच के अत्याधुनिक सुविधा अउ तकनीक ले ही उंकर उपर अंकुश लगाये जा कसही। पुलिस विभाग अपराध के अनुसंधान अउ कानून-व्यवस्था बनाए रखे के सरलग नवा तकनीक ल अपनावत हावय।