फसल बर्बाद होए के सेती आत्महत्या करइया किसान के परिवार ल 25 लाख मुआवजा अउ कीटनाशक कंपनी के खिलाफ कार्रवाई के मांग करिस छत्तीसगढि़या क्रांति सेना

अंजोर
0

अंजोर.दुर्ग,10। दुर्ग जिला के गांव मतरोडीह के युवा किसान डुगेश निषाद ह पाछु दिन अपन खेत म खुदकुशी करग ले रिहिसे। उंकर मउत के कारण नकली कीटनाशक के सेती खेत के फसल बर्बाद होना बताये जावत हाबे। मेहनत ले पछीना ओकरा के अपन अऊ परिवार के पेट पोसइया जवान बेटा के बीते के दुख म घरवाले के आंखी म आंसू नी ठाहरत हाबे। अइसन बखत म परिवार के दुख बाटे पर मतरो‍डीह गांव पहुंचिस छत्तीसगढि़या क्रांति सेना के सेनानी मन।

बेबस बाप ह छत्तीसगढि़या क्रांति सेना ल अपन दुख बतावत रो डरिस। सबले बड़का दुख के बात ए आए के गांव मतरो‍डीह वो अंचल आए जिहा ले कद्दावार नेता मुख्यमंत्री, गृहमंत्री, कृषिमंत्री के नता हावय, तिहां किसान आत्महत्या कर लेथे तव भला आन के कोन देखइया। समाचार एजेंसी ले मिले आरो के मुताबिक गांव मातरोडीह पहुंच के छत्तीसगढि़या क्रांति सेना के प्रदेश अध्य्क्ष अमित बघेल अउ आन बड़का सेनानी मन शासन प्रशासन ले ये मांग करिन के पीडि़त परिवार ल 25 लाख रूपिया मुआवजा देवय अउ नकली दवाई कंपनी ऊपर ठोस कार्रवाई होना चाहि। 

मामला बहुत गंभीर हावय 15 बछर ले सरलग किसानी करइया छत्तीसगढ़िया किसान नकली दवई ले पीड़ित होके मउत ल गला लगा लिस। अउ निर्दई सरकार ह 6 एकड़ के फसल बर्बाद होये के मुआवजा मात्र 4 लाख रूपिया दे के रफादफा करे के जुगत म हावय। छत्तीसगढ़िया क्रान्ति सेना ह सरकार ल यहू किहिन के ओमन कहू दवई कंपनी ले मुआवजा देवाय म सक्षम नी होही तव ये बुता हमला देवय। हम उंकर बुता बनाके पीड़ित परिवार ल न्याय देवाबो।

एक टिप्पणी भेजें

0टिप्पणियाँ

सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।

एक टिप्पणी भेजें (0)

#buttons=(Accept !) #days=(20)

Our website uses cookies to enhance your experience. Check Now
Accept !