राजस्थानी गांजा तस्कर अइस कोमाखान पुलिस के सपड़ म, ओडिशा ले दिल्ली लेगत डेढ़ करोड़ के गांजा संग दू आरोपी गिरफ्तार

अंजोर.महासुमंद,26। महासमुंद पुलिस के सतत निकरानी के सेती आन राज के बड़े-बड़े तस्कर मन अब थर्रावत होही, कइसनो कर ले बोचक नइ सके महासमुंद पुलिस चौकी के पार। येकर कतकोन उदाहरण देखे हाबन, आजेच आरो मिले हाबे के थाना कोमाखान पुलिस ह करीब डेढ़ करोड़ के गांजा समेत राजस्थान के दू आदमी ल गिरफ्तार करे हाबे। समाचार एजेंसी के मुताबिक कोमाखान थाना प्रभारी के टीम ल चेकिंग के बखत ओडिशा कोति ले आवत ट्रक ल ग्राम टेमरी फॉरेस्ट नाका म रोके गिस। वाहन के तलाशी करे म सब्जी खाली कैरेट के नीचे 26 बोरी म भराये 165 पैकेट झिल्ली म लपटाये गांजा मिलिस। 

महासमुंद पुलिस ह वाहन म सवार खालिद भरतपुर, राजस्थान अउ साकिर हुसैन अलवर, राजस्थान ले पूछताछ करे म ओमन गांजा ल भवानीपटना, ओडिशा ले दिल्ली ले जाना बताये हाबे। आरोपी मनके कब्जा ले 1 करोड़ 62 लाख रुपिया कीमत के 8 क्विंटल 10 किलो गांजा जब्त करके गिरफ्तारी करे गे हावय।