डोंगरगढ़ के मां बम्लेश्वरी मंदिर म एसो नइ भरावे नवरात्रि के मेला, परंपरागत रूप ले होही माता के पूजा-अर्चना

अंजोर.राजनांदगांव,26। मां बम्लेश्वरी मंदिर डोंगरगढ़ म क्वार नवरात्रि के मेला आयोजन के संबंध म कलेक्टोरेट सभाकक्ष म जिला कलेक्टर, एसपी अउ मंदिर ट्रस्ट के बइठका होइस। जेमा कोविड-19 महामारी ल देखत सर्वसम्मति ले फइसला करे गिस के मां बम्लेश्वरी मंदिर डोंगरगढ़ म मेला आयोजित नइ होवय, परंपरागत रूप ले माता के पूजा-अर्चना करे जाही। ये मउका म मां बम्लेश्वरी मंदिर ट्रस्ट के अध्यक्ष नारायण लाल अग्रवाल अउ सदस्य मन कोविड-19 के कठिन समय म हरसंभव सहयोग करे बात तको केहे हाबे। कलेक्टर श्री वर्मा ह पंडाल नइ लगाये, पदयात्रा स्वीकृति नइ देना अउ नवरात्रि मेला के निरस्त होए के आरो आम लोगन मन ल देके निर्देश दे हाबे। बइठका म पुलिस अधीक्षक डी श्रवण, मुख्य चिकित्सा स्वास्थ्य अधिकारी डॉ. मिथलेश चौधरी, एसडीएम डोंगरगढ़ अविनाश भोई, वनमंडलाधिकारी राजनांदगांव बीपी सिंह, जिला पंचायत सीईओ श्रीमती तनुजा सलाम, अतिरिक्त पुलिस अधीक्षक जयप्रकाश बड़ई, राजनांदगांव एसडीएम मुकेश रावटे, खैरागढ़ एसडीएम श्रीमती निष्ठा पाण्डेय अउ मां बम्लेश्वरी मंदिर ट्रस्ट के रघुवर प्रसाद अग्रवाल, सदस्य नवनीत तिवारी, संजय अग्रवाल, सुभाष अग्रवाल मन जुरियाए रिहिन हाबे।