धमतरी.07। अब जिला के निजी अस्पताल म तको कोविड केयर वार्ड बनाए जाही। ये संबंध म कलेक्टर ह आज आई.एम.ए. अउ निजी अस्पताल के प्रतिनिधी मनके बइठक लेके कोविड 19 के इलाज म सहयोग के अपेक्षा करिन। ओमन किहिन के जिला म कोरोना के बढ़त मरीज के संख्या ल देख उंकर इलाज जिला म ही संभव हो, ये सेती निजी अस्पताल के एक-एक वार्ड ल चिन्हांकित करके कोविड केयर वार्ड बनाए जाही। संक्रमण के लक्षण वाला मरीज ल जल्दी ले जल्दी चिकित्सीय सुविधा उपल्बध कराये ले मउत के आशंका ल कम करे जा सकथे, येकर बर निजी अस्पताल म कोविड केयर वार्ड बनाना जरूरी हावय।
कलेक्टर ह जिला के निजी अस्पताल, जिहा 20 ले जादा बेड हावे, उहां स्वास्थ्य विभाग के जिला स्तरीय समिति भ्रमण करके देखही अउ कोविड केयर वार्ड के रूप म बदले खातिर निर्देशित करही। अस्पताल म उपचार अउ मरीज ल संभालने खातिर तय प्रोटोकॉल सम्बन्धी प्रशिक्षण उहां के स्टाफ, नर्स, पैरामेडिक्स ल स्वास्थ्य विभाग डहर ले दे जाही।
आयुष्मान भारत स्वास्थ्य कार्ड ले तको मरीज मनके इलाज करे जाही। येकर अलावा राज्य शासन ह जिल म उपलब्ध निजी अस्पताल म सुपर स्पेशलिटी सुविधा ल ध्यान म रखत तीन श्रेणी म रखे हावय, धमतरी जिला बी श्रेणी म हावय अऊ इही मुताबिक इलाज के दर तय करे गे हावय। अगर निजी अस्पताल म आंशिक लक्षण वाले मरीज के आइसोलेशन बेड म इलाज करे जाही तव प्रतिदिन के दर 4960, गंभीर मरीज जेला आईसीयू क जरूरत हावय उंकर बर 8000, बहुत गंभीर मरीज जेला आईसीयू अउ वेंटिलेटर के जरूरत हावय 11200 रूपिया दर तय करे गे हावय। ये मउका म जिला कलेक्टर संग सीईओ जिला पंचायत श्रीमती नम्रता गांधी, अपर कलेक्टर दिलीप अग्रवाल सहित चिकित्सक मन उपस्थित रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।