सरकारी स्कूल म भर्ती के आखरी बखत म जागिस सरकार, अब होही नि:शुल्क प्रवेश, पहिली के पइसा वापिस कोही के नहीं ?

रायपुर.03। प्रदेश के सबो सरकारी स्कूल मन म कई दिन पहिली ले ही भर्ती के प्रक्रिया चलत हावय। ऑनलाइन पढ़ाई के साथ पाठ्य पुस्तक अउ गणवेश के वितरण होगे होवय। फेर सरकार तक ये बात देरी ले पहुंचिस के सरकारी स्कूल वाले मन तको प्रवेश शुल्क लेवत हावय। 

मिले आरो के मुताबिक 2 सितंबर के सरकार कोति ले ये निर्देश दे गिस के सबो शासकीय स्कूल म विद्यार्थी मनला निःशुल्क प्रवेश दे जाही। संचालक स्कूल शिक्षा ह सबो संयुक्त संचालक शिक्षा संभाग अउ जिला शिक्षा अधिकारी ल अपन-अपन संभाग अउ जिला के अंतर्गत शासकीय स्कूल म लइका मनके निःशुल्क प्रवेश के व्यवस्था सुनिश्चित करे के निर्देश दे हावय।

संयुक्त संचालक शिक्षा संभाग अउ जिला शिक्षा अधिकारी ल जारी निर्देश म केहे गे हावय के कुछ जिला ले ये शिकायत मिले हावय के शासकीय स्कूल म प्रवेश खातिर स्थानीय निधी जइसे ए.एफ., पी.बी.एफ., स्काउट, रेडक्रॉस, शाला विकास आदि शुल्क ले हाबे। अब के समय म सबो संस्थांन बंद हावय तव कोनो प्रकार के शुल्क नइ लिये जाए। फेर मिले आरो के मुताबिक कतकोन पालक मन स्कूल म प्रवेश शुल्क जमा कर डारे हाबे अब उंकर पइसा के का होही! यहू सवाल उठत हाबे, फिलहाल पइसा वापसी के संबंध म कोनो आरो नइ मिले हावय।