बस्तरवासी मनके सहयोग ले यहू साल होही विश्व प्रसिद्ध बस्तर दशहरा उत्सव के सफल आयोजन : बस्तर दशहरा समिति

जगदलपुर.04। जगदलपुर म आयोजित होइवया विश्व प्रसिद्ध बस्तर दशहरा के सफल आयोजन खातिर  आज सिरहासार भवन जगदलपुर म बस्तर दशहरा उत्सव समिति के पहिली बइठका आयोजित करे गिस। ये मउका म सर्व सम्मति ले अर्जुन मांझी ल बस्तर दशहरा समिति के उपाध्यक्ष नामांकित करे गिस। बइठका म यहू साल दशहरा के सफल आयोजन अउ कोरोना काल ल देखत कई ठोस फइसला करे गिस। जेमा मावली परघाव के दिन केवल एक सेवा दार अउ ओकर एक सहायक के ही उपस्थिति सुनिश्चित करे गिस। 

आगू बस्तर दशहरा समिति के अध्यक्ष अउ सांसद बस्तर दीपक बैज कोति ले विश्व प्रसिद्ध बस्तर दशहरा के गरिमा अउ महत्ता ल अक्षुण्य बनाए खातिर बस्तरवासी मनले दशहरा के सफल आयोजन अउ बस्तर के ऐतिहासिक विरासत के संरक्षण अउ संवर्धन म सहयोग के अपील करिन। बइठका म विधायक कोण्डागांव मोहन मरकाम, बस्तर विकास प्राधिकरण के अध्यक्ष लखेश्वर बघेल, संसदीय सचिव शिशुपाल शोरी, हस्तशिल्प विकास बोर्ड के अध्यक्ष चंदन कश्यप, बस्तर विकास प्राधिकरण के उपाध्यक्ष विक्रम मण्ड़ावी, महापौर श्रीमती सफीरा साहू, बस्तर के महाराजा कमलचंद भंजदेव, नगर निगम के सभापति श्रीमती कविता साहू अउ अपर कलेक्टर अरविंद एक्का सहित मांझी, चालकी, मेम्बर-मेम्बरीन के अलावा दशहरा समिति के आन सदस्य मन जुरियाए रिहिन। 

एसो नोवल कोरोना वायरस के संक्रमण के सेती दशहरा उत्सव म जगदलपुर शहर म अउ दूर-दराज, ग्रामीण अऊ आन लोगन मनके भीड़ के उपाय, मांझी चालक मनके परगना म बइठका, रथ खिचइया मनके संख्या के अलावा आसपास के दुकान के विषय म गुनान करे गिस। ये पहिली मउका आए जब बस्तर दशहरा उत्सव म अइसन भिड़ ल लेके गोठबात होवत हाबे, कम आदमी अउ दुकान बंद रखना कोरोना काल ल देखत अस्थाई निर्णय आए।