Vyapam exam validity increased स्कूल शिक्षा विभाग के 14580 पद के व्यापम परीक्षाफल सूची के वैधता ल एक साल अऊ बढ़ाइस सरकार

रायपुर.1। स्कूल शिक्षा विभाग म 14580 पद म भर्ती खातिर व्यापम कोति ले परीक्षा लिये गे रिहिस। परीक्षाफल सूची जारी करे के बाद भी पदस्थापना नी हो पाये अबतक, परीक्षा पास करके नौकरी के रद्दा जोहत लइका मन खातिर एक अऊ फिकर के बात रि‍हिन के ओकर वैधता खतम होवइया रिहिस। ये मउका म मुख्यमंत्री के बड़का निर्देश म राज्य शासन के स्कूल शिक्षा विभाग डहर ले परीक्षा के वैधता एक साल अऊ बढ़ाये के आज मंत्रालय कोति ले आदेश जारी कर दे गे हावय। 

जानबा होवय के लोक शिक्षण संचालनालय ह 9 मार्च 2019 के 14 हजार 580 पद म सीधी भर्ती बर विज्ञापन जारी करे रिहिन। ये विज्ञापन के कण्डिका म अइसन उल्लेख रिहिस के व्यापम के प्राप्त परीक्षाफल सूची, परीक्षाफल जारी होए के दिनांक ले एक वर्ष तक वैध होही। अऊ अब कोरोना महामारी के सेती वर्तमान म भर्ती के कार्रवाई पूरा नइ हो सके हावय। ये सेती विशेष परिस्थिति ल धियान म राखत राज्य शासन डहर ले व्यापम के परीक्षाफल के सूची के वैधता ल एक साल अऊ बढ़ाये गे हावय।