देवभोग के अनमोल हीरा के अवैध तस्करी करत एक आरोपी 13 नग हीरा सहित गिरफ्तार

महासमुंद.1। छत्तीसगढ़ के रत्न गरभा अंचल देवभोग ले अनमोल रतन हीरा लानके अवैध रूप ले तस्करी करत एक आरोपी पुलिस के हाथ लगे हावय। मिले आरो के मुताबिक पुलिस अधीक्षक श्री प्रफुल्ल कुमार ठाकुर के मार्गदर्शन म थाना सिंघोड़ा अउ सायबर सेल के टीम ह छुईपाली चौक तिर घेराबंदी करके मोटर सायकल ल रोकिन जेमा संजय बाघ पिता सहदेव बाघ, ग्राम बाराडोली थाना सरायपाली सवार रिहिन। पूछताछ अउ तलाशी म ओकर मेर ले 11 नग बडे अउ 02 नग छोटे हीरा जइसन बहुमुल्य खनिज रत्न मिलिस। 

पुलिस टीम कोति ले कड़ाई ले पूछे म ओमन खनिज रत्न हीरा ल देवभोग के होना कबूले हावय अउ बेचे खातिर गिरहिक खोजत रिहिन। पुलिस ह आरोपी संजय बाघ उम्र 42 वर्ष साकिन बाराडोली थाना सरायपाली जिला महासमुन्द ल गिरफ्तार करके कुल 13 नग हीरा जप्त करे हावय। जेकर कीमत 4,20,000 रूपिया बताये गे हावय। पुलिस ह आरोपी के विरूद्ध धारा 379 ताएहि, 4 (21) खान अउ खनिज अधिनियम 1967 के तहत कार्यवाही करे हावय।