सरगुजावासी मनके कैंसर के ईलाज खातिर स्थानीय स्तर म कीमोथेरेपी के साथ रेडियोथेरेपी के सुविधा तको मिलही : श्री सिंहदेव

अम्बिकापुर.16। स्वास्थ्य मंत्री टीएस सिंहदेव के पहल म अम्बिकापुर के नवापारा के शहरी प्राथमिक स्वास्थ्य केंद्र म कैंसर के ईलाज खातिर कीमोथेरेपी के सुविधा सुरू होगे। मिले आरो के मुताबिक स्वास्थ्य मंत्री श्री सिंहदेव के मुख्य आतिथ्य म दू बिस्तर के दीर्घायु वार्ड म स्थापित कीमोथेरेपी के ऑनलाइन शुभारंभ करे गिस। ये मउका म जिला पंचायत सदस्य आदित्येश्वर शरण सिंहदेव अउ बालकृष्ण पाठक, महापौर डॉ. अजय तिर्की, जिला पंचायत के उपाध्यक्ष राकेश गुप्ता, पार्षद द्वितेंद्र मिश्र, श्रीमती गीता रजक तको जुड़े रिहिन। श्री सिंहदेव किहिन के स्थानीय स्तर म कैंसर के इलाज खातिर नवापारा प्राथमिक स्वास्थ्य केंद्र म कीमोथेरेपी के व्यवस्था होगे अब मरीज मनला बड़े शहर म जाये के जरूरत नइ परय। कैंसर के ईलाज खातिर कीमोथेरेपी के साथ ही रेडियोथेरेपी के तको जरूरत होथे। रेडियोथेरेपी के सुविधा तको जल्दी उपलब्ध कराये के प्रयास करे जाही।