पाटन ब्लॉक के गांव भोथली, जमराव, मगरघटा, घुघुवा अउ खुड़मुड़ा के दौरा करिन जिला कलेक्टर, गोठान अउ बाढ़ के लिस आरो

दुर्ग.29। जिला कलेक्टर ह क्षेत्र के सघन दौरा करत पाटन ब्लॉवक के आधा दर्जन गांव म पहुंचिस। ये मउका म ओमन ग्राम भोथली अउ मगरघटा के गौठान मनके निरीक्षण करिन। ग्राम भोथली म वर्मी टैंक बनाय म देरी म नाराजगी जाहिर करत किहिन के गोधन न्याय योजना शासन के सर्वोच्च प्राथमिकता के योजना आए। जेमा पशुपालक मनले गोबर खरीदे जाही। गोबर ल वर्मी कंपोस्ट बनाना हावय, येमा गौठान समिति अउ स्वसहायता समूह के महिला मनला लाभ होही। वर्मी टाका के लघियात काम सुरू करे के निर्देश देवत ओमन खारून नदी के किनारे वाला गांव बाढ़ के पानी के आरो ले खातिर जिला पंचायत सीईओ सच्चिदानंद आलोक, एसडीएम विनय पोयाम अऊ आन अधिकारी संग पहुंचिन। 

जमराव गांव म तको पानी गांव तक पहुंच गे हावय, 15 मकान ल नुकसान होए हाबे। अवइया खतरा ल देखत लोगन मन ल बने ठउर म पहुंचाये गिस। ये मउका म गांव वाले मनले गोठबात करत हाईस्कूल के बांउन्ड्री, घुघुवा-खुड़मुड़ा नाला म पुलिया के प्रस्ताव सरकार ल भेजे के बात किहिन। दौरान म मुख्यमंत्री के ओएसडी श्री आशीष वर्मा तको विशेष रूप ले उपस्थित रिहिन। दौरा म आगू पाटन नगर पंचायत म होवत बुता ल देखिन अउ नकटा जलाशय के आन महत्वपूर्ण तालाब म होवत बुता के आरो लिस।