जगदलपुर.26। कलेक्टर रजत बंसल अउ पुलिस अधीक्षक दीपक झा जी मन आज जगदलपुर शहर अस्थाई सब्जी मार्केट के व्यवस्था देखे खातिर पहुंचिन। दूनो अधिकारी मन सबले आगू जुन्ना मण्डी परिसर म संचालित अस्थाई थोक मार्केट के व्यवस्था के जायजा लिस। शहर के प्रमुख बाजार स्थल संजय मार्केट म व्यापारी अउ चेम्बर्स ऑफ कामर्स के प्रतिनिधि ले चर्चा करत गोदाम व्यवस्था, पार्किंग संग आन समस्या के संबंध म व्यापारी मन कलेक्टर ल जानकारी दीस। कलेक्टर ह उंकर समस्या के निराकरण करे के आश्वासन दे हावय। येकर अलावा इतवारी बाजार, गीदम रोड म अस्थाई सब्जी बाजार के तको निरीक्षण करिन। उहां राष्ट्रीय राजमार्ग गीदम रोड म लगत सब्जी व्यापारी अउ खरीदार मनके जान-माल के नुकसान ल देखत ओमन ल मिशन कम्पाउंड ग्राउंड म अस्थाई रूप ले सब्जी मार्केट लगाये खातिर निगम आयुक्त ल निर्देशित करिन। मउका म अपर कलेक्टर अरविंद एक्का, आयुक्त नगर निगम प्रेमकुमार पटेल, एसडीएम जगदलपुर प्रवीण वर्मा संग आन अऊ अधिकारी जुरियाए रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।