बीजापुर.28। बस्तर सांसद श्री दीपक बैज आज बीजापुर जिला के बाढ़ प्रभावित ईलाका के जायजा लिस अउ बाढ़ प्रभावित परिवार ले मिलके उंकर समस्या सुनिस अउ निराकरण के भरोसा तको देवाइस। ओमन राहत शिविर मे रहइया बाढ़ प्रभावित मन खातिर भोजन सहित आान व्यवस्था के बारे म तको जानकारी लिस।
ये मउका म ओमन किहिन के बाढ़ प्रभावित मनके मकान-फसल क्षति के आंकलन करके अतिशीघ्र सहायता दे जाही। बाढ़ प्रभावित सहित क्षेत्र के जनप्रतिनिधी अउ पंचायत पदाधिकारी मनले चर्चा करत ग्राम पंचायत म बाढ़ ले सुरक्षित स्थान म मकान बनाये खातिर ठउर चिनहे बर केहे हाबे। साथ ही मकान क्षति वाले बाढ़ प्रभावित मनके बैंक खाता म सहायता राशि अंतरित करके मकान बनाये खातिर जरूरी मदद के निर्देश अधिकारी मनला दीस। अऊ पशुधन हानि के प्रकरण म मुआवजा राशि के स्वीकृति प्रदान करे खातिर केहे हाबे।
सांसद बस्तर श्री दीपक बैज ह बीजापुर जिला के जैवारम, मिनगाचल, तुमला, गुदमा के कुरसम ईरपा, सुदरू कुरसम, वेंकटी पोंदी, कुरसम समलू, श्रीमती सोनी कुड़ियम, मुन्नी कोरसा अउ सविता हेमला मनले मकान-फसल क्षति के बारे म पूछत लघियात सहायता प्रदान करे के भरोसा देवाये हाबे। राहत शिविर म रहइया मनके रूके के साथ भोजन, पेयजल, चादर-मच्छरदानी आदि खातिर प्रशासन के व्यवस्था ल सहरावत जरूरत के मुताबिक कम्बल-साड़ी प्रदान करिन।
ये कउकर म जिला पंचायत अध्यक्ष शंकर कुड़ियम, जिला पंचायत उपाध्यक्ष कमलेश कारम संग क्षेत्र के जनप्रतिनिधी, पंचायत पदाधिकारी अउ एसडीएम भैरमगढ़ एआर राणा, एसडीएम बीजापुर हेमेन्द्र भूआर्य अउ आन अधिकारी-कर्मचारी मौजूद रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।