बोलेरो गाड़ी म छेक के मोटरसाइकिल वाला ल लूटइया दू आरोपी ल ओडिशा म धरिस सरिया पुलिस

रायगढ़.26। सरिया थाना क्षेत्र म पाछू महीना क्रेसर के अकाउंटेंट के मोटरसाइकिल ल ओवरटेक करके बोलेरो म दू युवक मन अकाउंटेंट ल डरा धमका के ओकर मोबाइल अउ पइसा ल फिल्मी स्टाइल म लूट ले रिहिसे। महीना भर बाद थाना प्रभारी सरिया निरीक्षक अंजना केरकेट्टा अउ उंकर टीम ह ये प्रकरण के दूनो आरोपी मनला धरे हावय। 

जानकारी के अनुसार ग्राम भीखमपुरा थाना सरिया रहइया मनोज कुमार साहूले 14 जुलाई के थाना सरिया म बोलेरो चालक अउ साथी ह मोबाइल के संग पर्स म धरे 10,000 रूपिया ल तको लूटे के रिपोर्ट दर्ज कराये रिहिसे। सरिया पुलिस मामला के जांच करत प्रार्थी के रिर्पोट के आधार म वाहन बोलेरो के जरिए लूटपाट के आरोपी सुनील उर्फ चांटी, टिकेश्वर सोरा उर्फ टिके निवासी ग्राम भुक्ता थाना अम्बाभौना जिला बरगढ़ ओडिशा तक पहुंचिन। आरोपी मनला ओडिशा ले धरे गिस उंकर तिर ले लूट के मोबाइल, नगद रूपिया के जब्ती के संग वारदात म उपयोग करे बोलेरो वाहन अउ एक नग चाकू जप्त करे गे हावय। थाना सरिया के अपराध क्रमांक 99/2020 म धारा 392,34 IPC के तहत गिरफ्तार करके आरोपी मनला रिमांड गे हावय।