रायगढ़ जिला के पुसौर अउ सरिया बाढ़ प्रभावित क्षेत्र के दौरा करिन कलेक्टर अउ एसपी

रायगढ़.29। सरलग पानी बरसे ले छत्तीसगढ़ के लगभग सबोच जिला म बाढ़ के हालात बने हावय। स्थानीय प्रशासन अपन स्तर म जान-माल के सुरक्षा खातिर दिन रात जुझे हावय। रायगढ़ जिला कलेक्टर श्री भीम सिंह अउ पुलिस अधीक्षक श्री संतोष कुमार सिंह ह आज पुसौर अउ सरिया बाढ़ प्रभावित क्षेत्र के दौरा करिन। ये मउका म ओमन बाढ़ म फसे लोगन मन निकाल के राहत कैम्प म पहुंचाये के निर्देश देवत, बरडोली गांव वाले मनले बातचीत करके सबो लइका सियान मनला सुरक्षित ठउर म जाये बर किहिन। राहत कैम्प म रहइया मन खातिर भोजन पानी के बेवस्था बर अधिकारी मनला जिम्मेदारी दिस, डीएफओ ह जिला के सबो राहत कैम्प म जलाउ लकड़ी, बांस, बल्ली के जोखा करही। 

मिले आरो के मुताबिक पुसौर तहसील के 10 गांव के लोगन मनला सुरक्षित स्कूल भवन अउ सामुदायिक भवन म बाढ़ राहत कैम्प बनाके रूकवाये गे हावय। प्रशासन, पुलिस अउ राजस्व विभाग बचाव कार्य म लगे हावय। अइसने सरिया क्षेत्र के बाढ़ प्रभावित राहत कैम्प भठली अउ लुकापारा म तको राशन पानी के बेवस्था करे जावत हाबे। ओमन किहिन के बरसा बंद होये के बाद सबो बाढ़ प्रभावित क्षेत्र के सर्वेक्षण कराके मकान गिरे अउ फसल के नुकसान के सर्वे कराये जाही अउ राज्य शासन कोति ले निर्धारित मुआवजा दे करे जाही।