राजनांदगांव.28। सरलग दू दिन के झड़ी पानी म राज्य के कई जिला पानी-पानी होगे हावय। नदिया नरवा पूरा आगे हावय। फसल के संग जान-माल के तको होवत हाबे गजब नकसानी। आज जिला कलेक्टर श्री टोपेश्वर वर्मा अउ पुलिस अधीक्षक ह खैरागढ़ विकासखंड के बाढ़ प्रभावित क्षेत्र के दौरा करिन। इतवारी बाजार म जल भराव के स्थिति के जायजा लेवत कलेक्टर श्री वर्मा ह एसडीएम श्रीमती निष्ठा पाण्डे ले राहत कार्य के जानकारी लीस।
ओमन किहिन के बाढ़़ प्रभावित सबो लोगन मनला सुरक्षित ठउर म पहुंचाव ताकि जन-धन के हानि झिन होवे। नगर निगम परिषद सांस्कृतिक भवन म रूके बाढ़ प्रभावित लोगन मन ले मुलाकात करत भोजन व्यवस्था के संबंध म तको जानकारी लीस।
एसडीएम श्रीमती निष्ठा पाण्डे ह बताइन के गजब पानी गिरे के सेती आमनेर नदी म पूरा आगे हावय। अऊ पानी ह शहर के इतवारी बाजार, गंजीपारा, टिकरापारा, दाऊ चौरा वार्ड म घर म भरावत रिहिस। उहां के लोगन मनला बने सुरक्षित ठउर म ठहराये गे हावय। लगभग 400 बाढ़ प्रभावित लोगन सुरक्षित ठउर म पहुंच गे हावय अउ लगभग 14 गांव के राहत शिविर म 172 लोगन आगे हावय। प्रशासन के टीम सरलग लोगन ल सुरक्षित ठउर म पहुंचाये खातिर राहत कार्य म लगे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।