मुख्यमंत्री ह सबो जिला कलेक्टर ल जेईई अउ नीट के परीक्षार्थी मन खातिर निःशुल्क वाहन बेवस्था के दिस निर्देश

रायपुर.30। मुख्यमंत्री श्री भूपेश बघेल ह सबो जिला कलेक्टर मनला राष्ट्रीय स्तर म आयोजित होवइया प्रवेश परीक्षा आईआईटी, जेईई (JEE) अउ नीट (NEET) परीक्षाथी मनला उंकर परीक्षा केन्द्र तक लाने अउ लेगे खातिर निःशुल्क वाहन के बेवस्था करे के निर्देश दे हावय। जारी आदेश म कहे गे हावय के परीक्षार्थी मनके संख्या के आधार म बस, मिनीबस, जीप आदि वाहन के बेवस्थाय सुनिश्चित करे जाए। जिला नोडल अधिकारी नियुक्त करे, क्षेत्रीय परिवहन कार्यालय (आरटीओ) अउ जिला परिवहन कार्यालय (डीटीओ) ले ये संबंध म समन्वय करे निर्देश तको दिस। 

जानबा होवय के कोरोना काल के सेती लइका मनला आए-जाए म गजब परेशानी होही। अऊ आईआईटी जेईई (JEE) परीक्षा 1 सितम्बर ले होवत हावय जेमा राज्य के लगभग 13 हजार 500 परीक्षार्थी शामिल होही। प्रदेश म ये परीक्षा खातिर 5 केन्द्र बनाए गे हावय। जेन अपन सुविधा ले आही-जाही तेन मन जा सकत हावय। शासन के साधन म जाही तेकर कोनो ले पइसा नी लेवय अऊ लड़की मन संग ओकर पालक तको संग म जा सकत हाबे। 

परिवहन वाहन म फिजिकल डिस्टेंसिंग के पालन अनिवार्य रूप ले करे जाही। वाहन म जाए खातिर परीक्षा के प्रवेश पत्र (एडमिट कार्ड) दिखाना होही। मुख्यमंत्री के निर्देश के बाद सबो जिला के नोडल अधिकारी अउ परिवहन ले जुड़े लोगन मनके मोबाईल नंबर के प्रचार प्रसार तुरते ले करे जावत हाबे।