कोरोना वॉरियर निरीक्षक मानसिंह राठिया ल हेमूनगर मुक्तिधाम म बिलासपुर पुलिस ह गार्ड ऑफ ऑनर ले दिस अंतिम बिदाई

बिलासपुर.30। कोरोना काल म सरलग अपन घर दुवार अउ खुद के फिकर करे बिगर समाज के सेवा म लगे सीपत थाना प्रभारी मानसिंह राठिया ल हेमूनगर के मुक्तिधाम म बिलासपुर पुलिस ह गार्ड ऑफ ऑनर ले अंतिम बिदाई दिस। जानबा होवय के ओमन एम्स रायपुर अपन इलाज करावत रिहिन जिहा आज बिहनिया आखरी सांस लीस। 

पुलिस कोति ले आरो के मुताबिक ओमन मूलतः ग्राम नागदरहा, धरमजयगढ़ के निवासी रिहिस अउ 1982 म आरक्षक के पद म नियुक्त होये के बाद 2013 म निरीक्षक के पद म पदोन्नत होके सीपत थाना प्रभारी के रूप म कार्यरत रिहिन हाबे। कोरोना प्रोटोकाल के पालन करत पुलिस विभाग के अधिकारी मन मुक्तिधाम म सह सम्मान अंतिम बिदाई दीस। थाना प्रभारी श्री राठिया के तस्वीर म एसपी प्रशांत अग्रवाल सहित पुलिस विभाग के बड़का अधिकारी अउ कर्मचारी मन पुष्प अर्पित करके विनम्र श्रद्धांजलि दीस।