मेड़पार म घोर लापरवाही, दू कोरी ले आगर गाय के होगे मउत, सीएम दीस कार्रवाई के निर्देश

बिलासपुर.25। बिलासपुर जिला के मेड़पार गांव म ग्रामीण जनप्रतिनिधी मनके घोर लापरवाही ले दू कोरी ले आगर गाय मनके मउत होगे। बताये गे के हाबे सबो गाय ल गांव के जुन्ना पंचायत भवन म ओइला के राखे गे रिहिसे। जेन प्रकार ले वीडियो सामने आए हाबे ओकर ले तो इही जान परथे के नानकून ठउर म गजब अकन गाय ल ठूसे गे रिहिस।  जिहां गाय मन असुविधा के अभाव म मरगे। 

प्रदेश के मुख्यमंत्री श्री बघेल ह मामला के गंभीरता ल देखत तुरते जिला कलेक्टर ल घटना के जिम्मेदार लोगन मन ऊपर कार्रवाई करे के निर्देश दे हाबे। श्री बघेल ह किहिन के बिलासपुर जिल के तखतपुर विकासखण्ड के ग्राम पंचायत मेड़पार म गाय मनके मउत के घटना बहुत ही दुर्भाग्यजनक आए। निर्देश म कलेक्टर अउ एस.पी. मउका म पहुंच के जांच करत हाबे। अऊ जादा जानकारी गाय मनके पोस्टमार्टम रिर्पोट आए के बादे होही। फेर अतका तो तय हाबे के जेन मुखिया ह गाय अउ गोबर ले लेके जबर योजना चलावत हाबे ओहा घटना के जिम्मेदार मनला नइ छोड़य। साथ ही अइसन घटना दूबारा झिन होवे येकरो बारे म गुनान करे जाही।