छत्तीसगढि़या माटीपुत्र स्व. श्री जोगी के प्रार्थना सभा म सामिल होइन राज्यपाल, मुख्यमंत्री

रायपुर.29। छत्तीसगढ़ के पहिली मुख्यमंत्री अउ छत्तीसगढि़या रतन बेटा स्वर्गीय अजीत जोगी जी के आत्मा के शांति खातिर उंकर सागौन बंगला म आज सर्वधर्म प्रार्थना अउ श्रद्धांजलि सभा के आयोजन करे गे रिहिस। जेमा प्रदेश के मुख्यमंत्री श्री बघेल अपन विनम्र श्रद्धांजलि अर्पित करत, डॉ. श्रीमती रेणु जोगी अउ पुत्र अमित जोगी ले भेंट करके अपन संवेदना व्यक्त करिन।

ये मउका म मुख्यमंत्री ह किहिन के पूर्व मुख्यमंत्री स्वर्गीय श्री जोगी के जीवन हम सबो ल हमेशा प्रेरणा देवत रही संघर्ष खातिर,  माटी के प्रति प्रेम अउ लक्ष्य पाये के लगन खातिर। श्री जोगी के जीवन अदम्य साहस ले भरे रिहसे। ओमन कभु हार नी मानिन। चाहे शिक्षा के क्षेत्र हो या प्रशासनिक अधिकारी के रूप म हो या फिर लेखन, विचार या राजनीति के क्षेत्र होवय। श्री जोगी ह सबोच क्षेत्र म अपन अमिट छाप छोड़े हाबे। 

स्वर्गीय श्री जोगी ल श्रद्धांजलि अर्पित करे खातिर सागौन बंगला पहुंचे प्रदेश के राज्यपाल सुश्री अनुसुईया उइके जी मन तको श्रद्धांजलि अर्पित करत किहिन के सामाजिक अउ राजनीतिक जीवन के उंकर योगदान ल छत्तीसगढ़ हमेशा याद करही। ओमन अपन पूरा जीवन समाज खातिर समर्पित कर दिस, आवव ये मउका म सबो उंकर सपना ल साकार करे के संकल्प लेवन।