रायपुर.19। लद्दाख के नियंत्रण रेखा (एल.ए.सी.) म चीनी सेना संग होए लड़ई अउ भारतीय जवान मनके शहादत के बाद भारत म चीन के गजब विरोध होवत हाबे। लोगन मन चीनी सामान के बहिस्कार के संगे-संग चाइना के लोकप्रिय एप टिक टाक आईडी ल तको डिलीट करत हाबे। छॉलीवुड के सुपर स्टार अनुज शर्मा ह सोशल मीडिया म घोसना करे के बाद अपन पौने दो लाख फॉलोवर वाले टिक टाक आईडी ल डिलीट कर दिस।
अनुज शर्मा किथे के जो देश हमर देश ल आंखी देखाही ओला मुंह तोड़ जवाब दे जाही। कोविड-19 के बाद मैहा टिक टाक वीडियो बनाना बंद कर दे रेहे अऊ अब येला पूरा बंद करत हवं। ओमन आगू जनता ले तको अपील करिन के चाइना के एप टिक टाक ल बंद करव अउ चीन के सामान के उपयोग करना तको बंद करव। हमर देश ले जेन ह मुनाफा कमाथे ओ हमी ल आंखी देखाथे। हमन ल मजबूत जवाब दे बर परही।
छॉलीवुड के लोकप्रिय कलाकार अउ प्रदेश सचिव साहित्य अउ सांस्कृतिक प्रकोष्ठ कांग्रेस जागेश्वरी मेश्राम ह तको अपन टिक टाक आईडी ल डिलीट करे हाबे। साथ ही खलनायक पुष्पेन्द्र सिंह, निशांत, सुनील सोनी, क्रांति दीक्षित, अंशु दास, दिव्या यादव, मनीष मानिकपुरी जइसन कतकोन कलाकार मन अब चीन के विरोध करत टिक टाक ल बंद कर दे हाबे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।