साबरमती रिवर फ्रंट के तर्ज म विकसित होही खारून रिवर फ्रंट : डॉ. शिवकुमार डहरिया

• महादेव घाट ले कुम्हारी तक बनही 8.5 किलोमीटर के पाथवे
• खारून नदी विर्सजन कुण्ड ले भोथली के बीच बनही बड़का पुल 

रायपुर.19। राजधानी रायपुर के खारून नदी तट ल अब गुजरात के साबरमती रिवर फ्रंट के तर्ज म बनाये के उदीम सुरू होवत हाबे। प्रदेश के नगरीय प्रशासन मंत्री डॉ. शिवकुमार डहरिया, रायपुर शहर के विधायकगण, महापौर अउ मुख्य सचिव संग खारून नदी म जाके रिवर फ्रंट प्लान के मौका-मुआयना तको करिन हाबे। मिले जानकारी के मुताबिक खारून म स्मार्ट सिटी, सिंचाई विभाग अउ जिला प्रशासन के समन्वय ले ये प्रोजेक्ट शुरू होवत हाबे। संगे-संग महादेव घाट के खारून नदी के दूनो छोर म कुम्हारी तक लगभग 8.5 किलोमीटर तक पाथवे बनाये जाही अउ महादेव घाट के विर्सजन कुण्ड ले लेके भोथली गांव नदी किनारे तक बड़का पुल बनाये जाही। येकर अलावा नदी के छोर म प्लांटेशन अउ सौन्दर्यीकरण के बुता तको होही।