छत्तीसगढ़ के वीर शहीद गणेश राम कुंजाम ल कांधा देके बिदा करिस सीएम

• गिधाली के शासकीय स्कूल के नामकरण शहीद गणेश राम कुंजाम के नाम म करे जाही 
• राजधानी के माना एयरपोर्ट म दीस छत्तीसगढ़ शासन ह भावभीनी श्रद्धांजलि 
• शहीद के परिवार ल सौपिन 20 लाख रूपिया अनुग्रह राशि, एक सदस्य ल मिलही सरकारी नौकरी

रायपुर.19। लद्दाख के नियंत्रण रेखा (एल.ए.सी.) म चीनी सेना मन संग होए लड़ई म भारतीय सेना के 20 जवान शहीद होगिस। जेमा छत्तीसगढ़ के कांकेर जिला के कुरूटोला ग्राम पंचायत के गांव गिधाली के रतन बेटा गणेश राम कुंजाम तको सामिल रिहिसे। लद्दाख ले दुलरवा बेटा शहीद कुंजाम के पार्थिव शरीर विशेष विमान ले रायपुर पहुंचिन। राजधानी रायपुर के स्वामी विवेकानंद एयरपोर्ट म वीर शहीद जवान गणेश राम कुंजाम के पार्थिव शरीर म पुष्पचक्र अर्पित करके छत्तीसगढ़ के मुख्यमंत्री भूपेश बघेल ह भावभीनी श्रद्धांजलि दीस। प्रदेश के मुखिया श्री बघेल ह वीर शहीद के शहादत ल नमन करत किहिन के अइसन बेटा ऊपर गरब हाबे हम छत्तीसगढि़या मनला। उंकर बलिदान बेकार नइ जावय, हम सब सेना के साथ हावन। एजेंसी ले मिले आरो के मुताबिक ओमन ये मउका म शहीद गणेश राम कुंजाम के नाम गांव के स्कूल ल करे के घोसना करिन अउ उंकर परिवार के एक सदस्य ल सरकारी नौकरी तको दे जाही। ये मउका म सीएम बघेल ह शहीद के पिता इतवारू राम कुंजाम ल छत्तीसगढ़ शासन कोति ले 20 लाख रूपिया के अनुग्रह राशि के चेक सौंपिन।

ये मउका म गृहमंत्री ताम्रध्वज साहू, कृषि मंत्री रविन्द्र चौबे, खाद्य मंत्री अमरजीत भगत, नगरीय प्रशासन मंत्री डॉ शिवकुमार डहरिया, स्कूल शिक्षा मंत्री डॉ प्रेमसाय सिंह टेकाम, पूर्व मुख्यमंत्री डॉ रमन सिंह, मुख्य सचिव आर. पी. मण्डल, पुलिस महानिदेशक डी. एम. अवस्थी सहित आन बड़का अधिकारी मन तको पुष्पचक्र अर्पित करिन। विमानतल म ही वीर शहीद ल गॉर्ड ऑफ ऑनर देके बाद शहीद के पार्थिव शरीर ल उंकर गांव पठोए गिस। गांव म होही छत्तीसगढ़ के शहीद बेटा गणेश राम कुंजाम के अंतिम संस्कार।