रायपुर.19। अक्ति माने के बाद ले ही गांव म किसानी के नवा दिन सुरू हो जथे। खातू-कचरा, कांटा-खूंटी अउ खेत के मेड़ मूही के काम पानी के गिरत ले चलथे। ये बखत तो गाय गरूवा मन ढिल्ला रिथे फेर धान के बोवई के बाद ले छेका-रोका हो जथे। अब एसो ले सरकार तको येमा चेत करत हाबे काबर के देखब आथे के कतको फसल ल तो ढिल्ला घुमइया मवेशी मन चर देथे। अइसन मन बर अब 19 ले 30 जून तक प्रदेश भर म अभियान चलाके गोठबात करे जाही। मवेशी मनके बंधेज होए ले किसान मन निसंसो होके दू फसली खेती कर सकथे। प्रदेश के मुखिया भूपेश बघेल ह जुन्ना प्रथा मनला अब नवाचार के रूप म फेर सुरता देवात किसान मनला बहुफसली खेती करे खातिर प्रेरित करत हाबे।
येकर ले फसल तो सुरक्षित रइबे करही संगे-संग पशुधन मन तको बने रइही। कृषि, पंचायत, ग्रामीण विकास अउ नगरीय प्रशासन विभाग कोति ले मैदानी अधिकारी मन गांव अउ शहर म लोगन ल जागरूक करही। नरवा, गरवा, घुरवा, बारी योजना के तहत गांव-गांव म बने गौठान ह येमा जबर भूमिका अदा करही। मवेश मनला ठिकाना मिलही अउ किसान ल खेती खतिर जैविक खाद। मिले जानकारी के मुताबिक कोरोना ल देखत हुए सरकार के निर्देश ल निभावत शहर म तको ‘‘रोका-छेका संकल्प अभियान’’ चलाके पशुपालक मनले अपन तिर तखार ल बने साफ सुथरा राखत शहर ल तको साफ-सुथरा अउ दुर्घटनामुक्त राखे के संकल्प पत्र भरवाये जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।