रक्षित केन्द्र दुर्ग म ‘स्पंदन अभियान’ के तहत वरिष्ठ पुलिस अधीक्षक ह जवान मन संग करिस गोठबात

दुर्ग.26। दुर्ग जिला के रक्षित केन्द्र म पुलिस के जवान मनला मानसिक तनाव ले दुरिहा रखे खातिर विभाग कोति ले चलत ‘स्पंदन अभियान’ के तहत वरिष्ठ पुलिस अधीक्षक श्री अजय कुमार यादव आज परेड के निरीक्षण करिस। स्पंदन अभियान ले मन स्वास्थ - तन स्वास्थ के भाव ल चरितार्थ करत पुलिस विभाग के बड़का अफसर मन हा पुलिस के जवान मनला मानिसक तनाव ले कइसे बाचे अउ अपन काम ल कइसे बने रकम ले करे जाए इही सब बात के सलाह देथे। काबर के अइसे देखे जाथे के पुलिस के जवान मन तको काम अउ परिवार के बीच कुछू काहीं होए म अपने जिनगी खुवार कर लेथे। वइसे अभी के कोरोना काल ल देखे जाए तव अइसन अभियान ले गजब लाभ होही। दुर्ग पुलिस के आधिकारिक ट्वीट के मुताबिक श्री यादव ह परेड के निरीक्षण के बाद करीब 90 मिनट तक जवान मनके स्वास्थ्य अउ पारिवारिक स्थिति के बारे म तको जानकारी लिस।