धमतरी जिला के नगरी म बने व्यवहार न्यायालय भवन के लोकार्पण वीडियो कॉन्फ्रेंस ले होइस आज
धमतरी.27। छत्तीसगढ़ प्रदेश के धमतरी जिला के नगरी म बने नवा व्यवहार न्यायालय भवन के लोकार्पण उच्च न्यायालय के मुख्य न्यायाधिपति श्री पी.आर. रामचंद्र मेनन ह वीडियो कॉन्फ्रेंसिंग के जरिए करिस। ये मउका म ओमन खुशी ले अपन बात रखत किहिन के वनांचल नगरी म अइसन सुविधा वाले व्यवहार न्यायालय भवन ले लोगन मनला न्याय मिले म सहूलियत होही। उम्मीद हाबे के बेहतरीन कार्य वातावरण तइयार करके इहां लंबित लगभग 314 प्रकरण के निपटारा गुणवत्तापूर्वक करे जाही। ये मउका म वीडियो कॉन्फ्रेंस ले जुड़े उच्च न्यायालय के न्यायाधिपति अउ पोर्टफोलियो जज धमतरी श्री गौतम चौड़रिया अउ छत्तीसगढ़ राज्य विधिक सेवा प्राधिकरण के कार्यपालक अध्यक्ष श्री प्रशांत मिश्र, जिला सत्र न्यायाधीश धमतरी श्री सुधीर कुमार, न्यायाधिपति श्री पी.पी.साहू मन तको बधाई देवत जिला प्रसाशन के बढ़ई करिन।
जनाबा होवय के धमतरी जिला के नगरी के मुकुंदपुर म लोक निर्माण विभाग कोति ले 239 लाख के लागत म बने भवन म 21 कमरा, कोर्ट रूम, सभागार, मध्यस्थता कक्ष, अभियोजन कक्ष, दुधपान कक्ष सहित सुविधायुक्त पीड़िता प्रतीक्षा कक्ष हावय जिहा बैठक व्यवस्था सहित एल.ई.डी. टीवी, लइका मन खातिर खिलौना उक हाबे। व्यवहार न्यायालय भवन के लोकार्पण कार्यक्रम के बाद जिला सत्र न्यायाधीश धमतरी श्री सुधीर कुमार अउ कलेक्टर श्री जय प्रकाश मौर्य व्यवहार न्यायालय परिसर म पौधा तको लगाइन। ये मउका म जिला कलेक्टर के अलावा नगरी अधिवक्ता संघ के अध्यक्ष श्री जागेश सोलंके फैमिली कोर्ट के जज श्री सिराजुद्दीन कुरैशी, अतिरिक्त न्यायाधिपति श्री पटेल, पुलिस अधीक्षक श्री बी.पी. राजभानु सहित अन्य सिविल जज अउ अधिकारी मौजूद रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।